terça-feira, 7 de março de 2017

DEMOKRASIA LABELE SAI FALI DEMOCREZY …!!!

PARTILHAR

Jornal Nacional Diário, editorial

Kandidatu Presidente Republika nain 8 dadaun nee tun ba base hodi halo kampaña eleisaun presidensial nian nebe sei halao iha loron 20 fulan Marsu mai. Kampaña presidensial nee, kandidatu sira apresenta sira nia vizaun, misaun no politika ba povu atu hatene molok loron eleisaun.

Kampaña Presidensial ba tinan 2017 nee publiku konsidera kandidatu balu laiha preparasaun nebe diak tamba iha loron kampaña nian, kadidatu balu halai tun sae buka transporte no balu fali labele halo kampaña ho razaun finansial.

Nunee mos Kandidatu Presidente balu autoridade lokal sira la autoriza halo kampaña iha sira nia suku laran tamba laiha karta konesimentu antes ba autoridade lokal no polisia nudar autoridade seguransa hodi fo seguransa.

Agora duvida mak nee kampaña presidensial nee presiza husu autorizasaun ba autoridade lokal? Intermos de administrasaun estadu, autoridade lokal mak boot liu ka administrasaun nasional mak boot liu? kampaña presidensial nee politika nasional nebe faz parte programa estado nian nebe sidadaun hotu hotu tenki obdese.

Kandidatu Presidente halo kampaña iha nebe deit dentru tempo kampaña nian laiha ema ida mak impende. Kazu kokretru, kandidatu Presidente  numeru 3, Amorim Vieria labele halo kampaña iha Bucoli, Muncipio Baucau no iha Lospalos, Municipiu Lautem tamba laiha karta autorizasaun ba autoridade lokal.

Problema sira nee akontese tamba falta sosilizasaun husi orgaun eleitoral sira, li-liu Comissão Nacional Eleisões (CNE), li-liu lei konaba kampaña presidensial nian.

Nunee mos antes tama ba loron kampaña presidensial, kandidatu sira partisipa marsa ba paz nebe organiza husi Diocese Dili ho objetivu atu kampaña presidensial no parlamentar mai nee bele lao iha ambiente paz no estabilidade maibe iha primeiru dia kampaña mosu ona konfrontus entre militantes kandidatu Lu-olo ho Kalohan.

Klaru, konfrontus apoiantes kandidatu rua nee laos orientasaun direita ka indireita kandidatu sira nian maibe nee oknum no mos bele dehan iha lia fuan seluk infiltrasaun ema terseira parte nebe hakarak hafoer no hamonu naran diak kandidatu rua nee nian no partido historiku Fretilin no Partido Demokratiku iha politika Timor Leste nian.

Agora ba fali kandidatu sira no lider partido sira nebe apoia kandidatu sira nee mos tenki kontrola ninia ema atu nunee labele estraga partido ninia naran no mos naran diak kandidatu sira nian.

Demokrasia fo liberdade atu sidadaun sira espresa sira nia hanoin, hakarak no eserse sira nia direitu tomak maibe keta haluha katak ita nia direitu limita iha ema seluk ninia direitu.

Labele uza ita nia dirietu hodi viola fali ema seluk ninia direitu, nee mak demokrasia. Demokrasia laos impoin ita nia hakarak, demokrasia laos obriga ema atu tuir ita nia hakarak.

Eleisaun Presidensial nee mos hanesan jogu demokratiku, kandidatu sira nebe konkore ba kadeira numeru um Timor Leste nee, entre kandidatu 8, ida mak sei sai Presidente Republika, kandidatu 7 seluk tenki simu lakon ho orgulhu, nee mak esensia demokrasia nian.*
PARTILHAR

Author: verified_user

Publicação luso-timorense sem fins lucrativos

0 comentários: