Artigu
hakerek hosi António Sampaio
Boina
metan ho fitan douradu ida ne'ebé Fatuk Mutin hatudu iha ain-tuur fó hatudu
sinal revolusionáriu ba "kuaze padre" ne'ebé troka ona formasaun
relijiozu ho polítika no agora hakarak sai nu'udar "prezidente ida ba
povu" timoroan.
"Ami
hetan formasaun iha aspetu rua ne'e: relijiaun ho polítika. Iha tempu ne'ebá
eskolla maka sai padre tanba igreja katólika hanesan defensór úniku povu nian.
Sai padre sai nu'udar defensor povu nian, hanesan sai polítiku", explika
hosi António Maher Lopes, (ne'ebé koñesidu ho naran Fatuk Mutin), iha
entrevista ida ba Lusa.
António
Maher Lopes - (hanesan kandidatu ida hosi kandidatu na'in ualu ba eleisaun
prezidensial sira iha loron 20 Marsu iha Timor-Leste no hanesan ida dahuluk iha
boletin votu nian) - pasa hosi formasaun maioria relijiozu ba knaar ativista
nian no hafoin formador polítiku nian.
"Relijiaun
katóliku hanorin buat barak mai ami, ba formasaun integral no humanu hosi povu
ne'e nian. No loos duni katak ne'e hanesan baze fundamental sira, ne'ebé iha
relasaun besik liu ho ami nia tradisaun. No ne'ebé kria koezaun entre ema ida
no instituisaun sira ne'ebé harii no estabelese iha povu nia leet. Ne'e hanesan
baze fundamental sira ne'ebé sai hanesan baze ba konstrusaun Estadu nian",
nia explika.
Hatete
katak "eis-padre revolusionáriu" ida ne'ebé hakarak ajuda halo
"revolusaun mental ida, adekuadu ba formasaun hosi sosiedade justu no
fraternu ida". Revolusaun ida lahó raan, ho dame, "ne'ebé povu senti
livre" maibé lahó funu no arma sira tanba ne'e "laiha sentidu
ona" no ema timoroan sira "baruk ona".
Hafoin
hakotu sekundáriu iha Semináriu Menor Nossa Senhora de Fátima iha Díli no hosi
Externato de São José nia kontinua estudu sira iha semináriu diosezanu ida no
iha Institutu Superior Filozofia no Teolojia Widya Sasana, iha Java, iha
Indonézia: "hakarak ba Portugal, maibé laiha posibilidade".
Hafoin
masakre Santa Cruz, iha 12 Novembru 1991, nia hamutuk ho grupu ida estudante
sira nian no liutiha semana ida organiza manifestasaun dahuluk hasoru Indonézia
iha Jakarta. "Hamutuk ema na'in 72. Na'in 70 ema kaer. Na'in rua konsege
halai. Ha'u polísia kaer iha Jakarta no tama iha kadeia to'o fulan-Marsu 1992.
No bainhira ha'u sai, ha'u la husik prosesu ne'ebé ha'u halo ona parte",
nia hanoin hikas.
Nia
ko'alia ho Lusa iha sede kampaña nian, besik tebes iha Katedral Díli nian,
ne'ebé grupu ida joven voluntáriu sira prepara material kampaña nian: kartaz
balun, autokolante sira no folletu ida ho biografia no manifestu polítiku nian.
Liberta
povu, harii asembleia popular ida no hametin estadu partisipativu hanesan baze
sira hosi diskursu polítiku ida ne'ebé hakarak halakon korupsaun no nepotizmu,
luta hasoru "rejimi kapitalista króniku" no hakotu ho koperasaun hosi
ajénsia internasional sira nian.
Hahú
independénsia, tinan 2002, dedika nafatin ba vida polítika, haleu fatin oioin
iha nasaun "hodi hakbesik ba povu hodi fó formasaun polítika no
serbisu", nia hatete katak nia serbisu ona iha formasaun sidadania nian
"iha perspetivu hodi liberta povu".
"Presiza
tanba povu la'ós hanesan bibi ida. Hanesan ema ida ne'ebé tenki eduka, explika
sidadania no direitu síviku. Tenki envolve povu iha prosesu demokrátiku",
nia afirma.
"Hanesan
festa demokrasia nian maibé ami hakarak atu festa ne'e hanesan moris, atu povu
hatudu supremasia hosi kbiit nian. Se la'e, povu hanesan de'it bibi ida ne'ebé
la'o tuir bibi-atan. Atu povu sai hanesan sujeitu hosi prosesu ne'e no hatudu
kbiit loloos ne'ebé delega ba nia líder sira. Atu líder sira labele senti
hanesan ema-boot. Ita la'ós ema ida, povu tenki hetan respeitu", nia
insisti.
Nia
deklara aan hanesan "servidor, orientador no povu nia mata-dalan" no
iha empeñu hodi eduka ba "sentidu Nasaun no Estadu nian", Fatuk Mutin
konsidera katak xefe Estadu foun tenki hanesan ema ida ne'ebé envolve ema timoroan
sira iha nasaun nia dezenvolvimentu.
Prezidente
dahuluk hafoin independénsia, Xanana Gusmão, halo ona "ekilíbriu
polítiku", no sai hanesan figura interior ida ho Governu ida "ne'ebé
lidera hos ema sira hosi liur".
Nia
susesor, José Ramos-Horta, "tau Timor-Leste iha mundu hamriik hanesan ho
nasaun sira seluk" no atual xefe Estadu, Taur Matan Ruak, hakarak
"hakbesik liután ba povu, lori Estadu ba baze sosiedade nian".
"Bainhira
ha'u sai nu'udar prezidente ha'u sei iha baze fundamental tolu ne'e hodi insentiva,
harii sentidu estadu nian, envolve povu hodi partisipa maka'as iha prosesu
konstrusaun Estadu nian", nia explika.
Kompromisu
ida "hodi liberta povu" no "liberta konsiénsia ne'ebé hetan
estraga hosi nakukun intelektual, hosi nakukun estrutural ne'ebé sei iha"
maibé nia konsidera katak igreja bele sai hanesan parseiru di'ak ida ba
formasaun nian.
Fatuk
Mutin deklara nu'udar kandidatu independente maibé konfirma apoiu hosi Partidu
Sosialista Timor nian (PST), forsa polítiku ne'ebé nia harii no hanesan mós
membru "la ativu", no mós hosi Movimentu Libertasaun Popular Povu
Maubere nian (MLPPM).
No
explika katak iha baze apoiu nian iha Ainaro, ne'ebé hanesan nia aman nia rain,
no iha Díli, ne'ebé hanesan nia inan nia fatin moris no hanesan fatin ne'ebé
ema hotu koñese nian "hahú hosi ki'ik to'o envolvimentu iha prosesu luta
nian" no to'o loron ohin.
Iha
relasaun "de facto" ho feto portugeza ida, Fatuk Mutin hatete katak
sira seidauk kaben tanba "sé maka kaben hakarak uma" no ne'e seidauk
iha posibilidade.
SAPO
TL ho Lusa
Sem comentários:
Enviar um comentário