terça-feira, 7 de março de 2017

“Tranzisaun Lideransa Tenki Naturál”

DILI, (ANTIL) – Prezidenti Komisaun B Parlamentu Nasionál, David Dias Ximenes Mandate hatete, tranzisaun lideransa hosi jerasaun fundadór nasaun ba jerasaun kontinuadór iha Timor-Leste la’ós obrigatoriu, husik buat hotu la’o ho naturál.

“Mudansa tenkiser naturál tanba dadaun ne’e buat hotu-hotu muda, ida katuas, seluk foin sa’e hanesan kontinuadór, ida ne’e la’ós obrigatoriu, Maubise 1 ho 2 la-dehan mudansa obrigatoriu, ne’e lalika manipula”, Mandate ba ANTIL iha uma fukun, Tersa (7/3).

Tranzisaun tuir Mandate, katuas ka foinsa’e depende ba ema nia mentalidade mak determina. Tranzisaun tenki la’o ho tempu, bainhira ezije hela de’it, ambisaun bele konsidera hanesan manias de poder. “Tranzisaun sei transmite ba malu nei-neik depende ba mentalidade”, hatutan.

Diferénsia idea entre lider polítiku sira ohin loron ne’e normál akontese ne’ebé de’it. “Ita tenki sai sujeitu ba demokrasia, labele sai fali objeitu ba Demokrasia.

Nasaun ne’e, tuir deputadu bankada FRETILIN, hakiak hela unidade iha diferénsia hanoin, nu’udar meius atinji unidade mútua.

“Kritika malu la’ós insulta malu, diskute malu la’ós haklalak malu, mai ita aprende hamutuk, ita nia demokrasia la’o loos hela no unidade di’ak”, fó hanoin tan.

Karta Pastorál, tuir bispu sira nia hanoin, oras ne’e momentu krusiál, presiza prepara-án atu halo pasajen husi “jerasaun tuan ba jerasaun foun”; husi “jerasaun fundadór ba kontinuadór sira-nian; “husi jerasaun istóriku sira ba jerasaun emerjente sira”.

Regra evolusaun mak tempu atu moris, boot, dezenvolve-án, moris iha plenitude, tempu atu lakon forsa, tempu atu sai husi palku moris nian, tempu atu reza no tempu atu fila ba Na’i Nia Kadunan Santu.

Risku ne’ebé hasoru mak modelu sosiedade ne’ebé tane aas ‘katuas lia-na’in sira”. Dala barak sira la rona foin-sa’e sira nia hanoin, tan konsidera ema nurak no ladauk iha kapasidade atu rezolve problema sosiedade nian.

Mentalidade maka ne’e duni no dala balu bele kondisiona ita-nia relasionamentu entre jerasaun sira, biar kontestu demokrátiku nia laran moris iha demokrasia formál, mentalidade bei-ala sira nian nafatin”.

Tan ne’e presiza prepara pasajen podér nian entre jerasaun sira: “jerasaun fundadór nian no jerasaun kontinuadór nian. (Jornalista: Manuel Pinto - Editora: Rita Almeida)

Foto: David Dias Ximenes Mandate. Foto espesiál

Sem comentários: