terça-feira, 7 de março de 2017

Liutiha tinan 25 antigu partisipante sira hosi Lusitânia Expresso hasoru malu iha Lisboa

PARTILHAR
Antigu partisipante sira no apoiante sira hosi misaun "Paz em Timor", halo iha ró Lusitânia Expresso nia laran iha tinan 25 liubá, iha loron-sábadu oinmai sei halibur iha Lisboa, hodi selebra inisiativu ne'e, maibé mós hodi reflete kona-ba kauza importante sira futuru nian. 

Enkontru, ne'ebé sei halo iha teatru Thalia, iha Lisboa, halo hafoin tinan 25 'ferry-boat' Lusitânia Expresso, lori ema na'in 141 ho nasionalidade oioin hamutuk 23 iha ró laran, barak liu estudante sira, tenki sai hosi bee sira Timor-Leste nian tanba obriga hosi ró mariña funu indonéziu nian.

Misaun "Paz em Timor", lidera hosi revista Fórum Estudante, hakarak tau koroa ida ai-funan nian iha rate Santa Cruz, iha Díli, ne'ebé akontese masakre ida iha loron 12 Novembru 1991.

Iha reenkontru ne'e, hakarak "harii momentu ida selebrasaun nian ba Lusitânia Expresso nia tinan 25 no mós ba Fórum Estudante nia tinan 25", hatete hosi diretor misaun nian, Rui Marques, ba Lusa.

Maibé, serimónia hakarak hanoin buat seluk mós: "Ami buka ona atualiza reflesaun - no bainhira hanesan loron ohin, saida maka sai hanesan kauza prinsipal sira hosi sékulu XXI?", explika hosi organizador.

"Ami sei selebra rekuza hosi indiferensa ne'e, rekuza hosi fatalizmu ne'ebé laiha esperansa, afirmasaun ne'ebé hatudu katak vale luta ba mundu di'ak ida", Rui Marques hatete.

Iha 1991/1992, nia hanoin hikas katak, "sira ne'ebé iha Lusitânia laran hanoin katak vale duni luta ba Timor-Leste nia independénsia no defende timoroan sira nia direitu ema nian" no ohin loron "vale duni luta hodi defende refujiadu sira nia direitu ema nian, ba sira ne'ebé moris iha nia tinan katuas iha izolamentu maka'as no laiha dalan sosial hodi bele sira nia loron ikus sira ho dignidade, ba kombate hasoru efeitu perversu sira dezempregu nian ka ba justisa sosial boot ida relasionadu ho situasaun sira hosi exkluzaun no kiak nian".

"Apelu maka fó liman ba malun hodi hala'o knaar ba dezafiu no kauza sira ne'ebé mosu iha ita nia tempu, tanba ita nia tempu agora presiza liu mane ka feto sira ne'ebé determinadu hodi harii mundu di'ak ida", Rui Marques destaka.

Iha sesaun ne'e sei partisipa hosi joven sira ne'ebé dedika ba intervensaun sívika no sosial, liuliu responsável sira hosi Konsellu Nasional Juventude nian ka hosi Plataforma Apoiu ba Refujiadu sira.

"Objetivu maka haree ba futuru hosi joven sira ne'ebé ohin loron iha tinan hanesan ho joven sira ne'ebé iha Lusitânia Expresso nia laran no ne'ebé hanoin katak bele no tenki halo buat ruma ba mundu", nia refere.

Sei iha mós debate ida ho jornalista sira kona-ba nia hanoin ba kauza importante sira, hein mós intervensaun sira hosi embaixadora timoroan iha Lisboa, hosi atual sekretária Estadu Ensinu Superior, Fernanda Rollo, no hosi Nuno Ribeiro da Silva, ne'ebé iha tempu ne'ebá hanesan sekretáriu Estadu Juventude nian no apoiante hosi inisiativu.

Rui Marques destaka ona katak sei partisipa mós "konvidadu espesial na'in rua, ne'ebé, maski la halo parte fizikamente iha Lusitânia, sira marka mós prezensa" iha misaun - maka atual prezidente hosi Konsellu Administrasaun hosi Caixa Geral de Depósitos, Emílio Rui Vilar, no jornalista Adelino Gomes.

Prezidente Repúblika Portugal nian, Marcelo Rebelo de Sousa, no Prezidente Repúblika Timor-Leste nian, Taur Matan Ruak, sei haruka sira nia mensajen.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: