quarta-feira, 5 de julho de 2017

“Fretilin Ba Timor Leste Ida Buras Liu”

MAUBISSE - Lema ka moto Partidu Fretilin iha elpar 2017 nee maka: “Fretilin ba Timor Leste ida buras liu”. Lema nee hakerek iha spanduk bainhira halo kampaina iha Liquica, Bobonaro, Ermera, Suai (Covalima), Ainaro no Same (Manufahi).

Iha Postu Administrativa Maubisse, bainhira Sekjer Partidu Fretilin Mari Alkatiri halo dialogu ho komunidade sira, iha fatin neba tau lema ida nee, inklu iha postu administrativa sira neebe Fretilin halo dialogu. Dialogu iha Maubisse, Alkatiri hateten, bainhira povu fo fiar ba Fretilin atu kaer ukun, Fretilin sei hadia Timor Leste ida buras liu ba povu hotu.

Bainhira Fretilin kaer ukun, Fretilin sei hadia Timor Leste ida buras liu ba povu hotu. Sei lahalo diskriminasaun ba ema ida,” hateten Alkatiri, Domingu (2/7/2017).

Bainhira Fretilin manan sei lidera governasaun maibe sei laukun mesak tamba Fretilin manan, signifika Xanana Gusmao mos manan, Nicolau Lobato nudar heroi ida, nia mos sente manan, Francisco Xaveir do Amaral (Proklamador) mos sente nia mos manan. Fretilin manan Ramos Horta maske laos Fretilin ona, nia mos senti nia manan, Fretilin manan Prezidenti da Republika Fransisco Guterres Lu-Lo mos manan.

I Fretilin manan lao tuir dalan Prezidente Lu-Olo nian dalan. Nia sai Prezidente ba povu tomak, Fretilin manan sei harii governu ida ba povu tomak.

Sei lahalo dikriminasaun iha ministeriu sira, tanba nee, militante partidu ka lapartidu, sei lahalo diskriminasaun ba se deit. Sidadaun Timor Leste, hot-hotu maubere nia oan,” hateten Alkatiri.


Iha biban nee Alkatiri koalia mos ZEESM Timor Leste iha Oecusse. Konsege hatudu filme badak ida konaba aktividade ZEESM durante tinan 2 iha Oecusse hahu 2015 too agora, saida maka harii iha neba.  ZEESM harii husi zero, iha tinan rua deit dezenvolvimentu infra-estruktura iha neba, hatudu suksesu.

Hau simu knar ida nee ho dezafius boot ida, dejafius atu hari modelu ida ho dezenvolvimentu atu loron tuir mai it abele habelar ba rai Timor Leste tomak,” dehan Alkatiri.

I nia dehan, Oecusse hanesan fatin ida ke halo experensia boot, ho medelu foun. Nee buat neebe mehi kleur ona, momentu nia sei asumi kargu Primeiru Ministru. “Modelu ida ke hau mehi kleur uluk hau sei sai primeiru Ministru atu halo halo, maibe lakonsege, tanba lafo tempu mai hau para atu hahu no habelar modelu ida nee”.

Ho susesu ZEESM nee, Oecusse sai refererensia ba Timor Leste. Tinan 10 sira ukun too agora, gasta osan kuaze sanuluh resin haat maibe rejultadu maka Maubise sei nafatin deit laiha mudansa barak iha Maubise.

“Ospital referensia iha Maubisse nee hau maka mai inagura iha hau nia tempu, doutor Timor oan barak servisu iha Maubisse nee mos iha hau nia tempu,” hateten Alkatiri.

Portantu bainhira Fretilin ukun, sei halo revizaun ba lei eleisaun suku. Membru Konsellu de suku labele simu $90 dolar tinan ida.

Reuniaun seis meses kada reniaun simu 45 dolar halo nusa maka simu 45 signifika reniaun tinan ida dala rua 90 dolar, hau husu deit ba suku sira, ba konsellu de suku sira nee laran lalika taridu,  servisu nafatin ba, liu liu agora ba eleisaun nee buka mobilize votante hotu hotu para ba vota,” nia dehan.

Agora dehan osan atu fo oituan ba xefi suku sira mos laiha, sira hatene ona eleisaun suku nee atu akontese, halo nusa maka latau orsamentu para fo motor ba xefi suku.

Tanba nee Fretilin manan kaer Governu sei halo orsamentu ratefikativu, iha orsamentu ratefikatu sei tau osan ba suku sira nee laos promesa nee direitu. Lei dehan sira iha direitu ba motor ida, estadu labele dehan latau osan atu sosa motor fo sira.

Iha fatin hanesan, Xefe Suku Manetu Alfredo Martins hateten hanesan Xefi suku  atu ejekuta programa ami nia suku atu organiza aktividade ami laiha orsametu atu organiza, ezemplu komunidade nia uma neebe maka afeitadu ba dezastera naturais ida emerjensia nee ami sei halo relatoriu ba husu ba husu, neebe hakarak Fretilin kaer ukun, labele kabe ba PNDS orsamentu.

Ida nee tenke tau ketak iha suku para programa sira neebe maka kiik nee xefi suku labele fera ulun halo proposta ba leten,” dehan Alfredo.

Nia dehan, Ho osan nee bele uza hodi bele responde lalais, purexemplu hanesan kontruksaun mai tarde laiha problema, tanba emerjensia nee xefi suku bele responde.

Entretantu Jose da Silva hanesan xefi Aldeia hateten, Konselu de suku nee subsidiu laiha tanba nee bainhira Fretilin fila ba ukun hare tok kestaun ida nee, dehan Jose.

Antes hahu kampaina, Sekjer Partidu Fretilin Mari Alkatiri ho komutiva too iha fatin dialogu iha tuku 14:oo, no simu direitamentu husi Koordendor Partidu Fretilin Munispiu Ainaro Manuel Martins, hafoin nee tanara tais ba Sekjer Partidu Fretilin Mari ho komutiva. Remata tara tais lia nain sira halo dadali hodi simu Mari Alkatiri ho komutiva tuir lisan Postu Administrativa Maubise.

Antes atu tama ba fatin dialogu, Alkatiri ho nia komutiva simu uluk bua malus husi lia nain sira hanesan simbolu matak malirin. Hafoin tama ba fatin dialogu neebe prepara ona husi komisaun organizadora. Dialogu hahu ho kanta hino nasional patria, kontinua kedan ho kanta hino Foho Ramelao, no minute de selensiu neebe dirizi direitamente husi Alkatiri. Carme Ximenes/EST-2

Suara Timor Lorosae

Sem comentários: