quarta-feira, 5 de julho de 2017

Prezidente xinés: Relasaun Xina-EUA penalizadu tanba "fatór negativu sira"

Relasaun sira entre Xina ho Estadus Unidus sai fraku hela tanba "fatór negativu sira", hatete hosi Prezidente xinés, Xi Jinping, iha loron-segunda ne'e bainhira ko'alia hosi telefone ho nia homólogu norte-amerikanu, Donald Trump, antes temi Taiwan, haktuir hosi imprensa estatal.

"Relasaun bilateral sira afetadu hela tanba fatór negativu sira. (…) Ami hein katak Estadus Unidus bele trata ho di'ak kestaun sira kona-ba Taiwan, tuir prinsípiu Xina ida de'it", afirma hosi Xi Jinping ne'ebé haktuir hosi televizaun estatal CCTV.

Trump nia administrasaun halo Pekin hirus beibeik, tanba autoriza, iha fulan-Juñu nia rohan, fa'an arma sira, inklui bomba guiadu, misil sira no torpedo sira, ho dolar biliaun 1,3 ba Taiwan, illa ida ne'ebé independente, maibé Xina reklama nia soberania.

Taiwan fahe malu hosi Xina iha final hosi funu sivil xineza, iha tinan 1949. Maibé, ema xinés sira la rekoñese nia Governu independente no konsidera illa hanesan provínsia Xina ida.


Embaixada xineza halo ona reasaun ba kestaun ne'e, hodi hatete katak fa'an arma sira ba Taiwan "sei prejudika konfiansa maka'as no koperasaun entre Xina ho Estadus Unidus".

Prezidente xinés, Xi Jinping, hasoru malu ona iha fulan-Abril ho nia homólogu norte-amerikanu, Donald Trump iha rezidénsia pesoal hosi bilionáriu republikanu nian, iha Florida. Hahú momentu ne'ebá bele haree katak relasaun bilateral sira karik hahú manas fali.

Maibé, tempu furak la dura ida, liuliu tanba Trump muda ona pozisaun kona-ba Xina, iha loron-kinta, tanba kestaun nuklear norte-koreanu.

Ba dala uluk, Trump fó sai kastigu sira hasoru banku xinés ida ne'ebé Washington akuza katak halo atividade ilegal sira ho Koreia-Norte, ne'ebé dezenvolve programa nuklear ida no ameasa beibeik Estadus Unidus.

SAPO TL ho Lusa

Sem comentários: