terça-feira, 4 de julho de 2017

Reporters Sans Frontières kondena suspensaun hosi RTP ho RDP iha Guiné-Bissau

PARTILHAR
Organizasaun Reporters Sans Frontières (RSF) kondena ona iha loron-tersa ne'e suspensaun hosi atividade sira RTP ho RDP nian iha Guiné-Bissau, hodi konsidera hanesan "violasaun todan ida ba liberdade expresaun no ba direitu asesu ba informasaun nian".

Iha komunikadu ne'ebé haruka ba ajénsia Lusa, organizasaun konsidera ona katak "la'ós normal atu jornalista sira sai vítima hosi konflitu polítiku sira".

"Bainhira taka meiu sira komunikasaun sosial hodi presiona Portugal, Guiné-Bissau sei laiha lian importante sira hodi kontribui ba pluralidade hosi opiniaun sira iha tempu krizi nian", refere hosi organizasaun ne'ebé defende liberdade imprensa nian.

Iha loron-sesta, ministru Komunikasaun Sosial Guiné-Bissau nian, Vítor Pereira, fó sai suspensaun ba atividade sira RTP, RDP no ajénsia Lusa nian iha Guiné-Bissau, hodi hatete katak hotu ona akordu koperasaun iha área komunikasaun sosial ne'ebé asina entre Lisboa ho Bissau.


Maibé, antes, fó sai ona katak Governu guiniense dezisti iha desizaun hodi suspende atividade hosi ajénsia Lusa iha nasaun ne'e, hodi mantén desizaun ba de'it RTP ho RDP.

Liutiha loron ida, ministru guiniense konvoka ona konferénsia imprensa foun, ne'ebé justifika desizaun ba suspensaun hosi atividade sira hosi rádiu no televizaun portugeza nian iha nasaun "la'ós hanesan kestaun polítika ida maibé tékniku de'it".

Tuir RSF, iha razaun ofisial sira ne'ebé maka autoridade guiniense sira la hatete, "karik Prezidente guiniense, José Mário Vaz, no nia governu hakarak halo nonook media sira ne'ebé aliña ho Governu Lisboa, ne'ebé karik iha ligasaun iha krizi polítika ne'ebé afeta" Guiné-Bissau liu tinan ida resin.

Organizasaun hanoin hikas katak iha loron anúnsiu ba suspensaun, Governu portugés refere ona iha komunikadu ofisial ida katak "laiha kontrolu editorial ruma kona-ba RTP, RDP ho Lusa", hodi subliña katak meiu komunikasaun sosial sira ne'e "iha independénsia no imparsialidade hanesan iha Bissau hanesan mós iha nasaun sira hotu ne'ebé maka sira iha prezensa".

RSF fó hanoin mós katak Guiné-Bissau okupa fatin 79 iha nia índise mundial ba liberdade imprensa iha tinan ne'e.

Guiné-Bissau hasoru hela situasaun ida krizi institusional dezde eleisaun ikus sira, ho afastamentu ida entre partidu vensedor hosi lejislativu sira no Prezidente Repúblika ne'ebé eleito mós.

Governu atual laiha apoiu hosi partidu ne'ebé manán eleisaun sira ho maioria absoluta no difikuldade polítiku ne'e halo nasaun oioin, entre sira maka Portugal, no instituisaun internasional sira apela ba konsensu ida.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: