Kalma hafoin eleisaun subar laran la hakmatek hosi konversa polítika

Hosi António Sampaio

Hakmatek maka'as ne'ebé maka senti iha loron-segunda ne'e iha estrada sira Díli nian la hanesan ho intensidade hosi konversa polítika sira, ne'ebé agora hahú ona hodi transforma rezultadu hosi lejislativu sira loron-sábadu nian iha Governu konstitusional ba dahitu.

Ba partidu sira hotu, maibé liuliu ba sira ne'ebé maka ema vota liu - Fretilin ho CNRT, ne'ebé haketak ho vitu rihun ida -, loron hirak tuirmai ne'e hanesan importante hodi determina futuru iha tempu badak no ambiente polítiku ne'ebé sei marka iha tinan lima oinmai.

Iha imprensa lokal ne'e hanesan tema úniku ne'ebé iha debate, iha nasaun ida ne'ebé paradu hela iha fulan ida resin nia laran - Governu ho Parlamentu funsiona ona maibé ladún ativu - no tenki hein ba semana balun nia laran to'o iha "responsável" foun sira.

Laiha maioria absoluta no partidu ida hosi partidu rua ne'ebé hetan liu votu (Fretilin ho fatin 23 no CNRT ho fatin 22) iha kondisaun sira - bainhira tau hamutuk pelumenus rua hosi forsa tolu sira seluk ne'ebé iha mós Parlamentu - hodi bele kaer kbiit hosi Governu konstitusional dahitu nian.

Iha kazu Fretilin nian, festa hahú sedu - oras 12 antes tanka kontajen -, ho partidu fiar iha númeru rasik hodi garanti katak iha ona vitória. Bainhira hahú kalan, CNRT hahú hatudu katak sira nia númeru mós sai kontráriu.

Konfiansa ida ne'ebé hanesan falsu no, la hanesan ho sede Fretilin ne'ebé nakonu ho múzika ho ahi nia naroman, la haree iha dirijente sira no militante sira, ne'ebé marka prezensa iha sede, ambiente ida ladún haksolok no ladún iha konfiansa.

Hatene katak diferensa hanesan ki'ik, Fretilin mantén festa to'o madrugada. Selebrasaun sira ne'ebé la hanesan ho nervozismu ne'ebé Cipriana Pereira, sekretáriu adjunta Fretilin nian, hatudu, iha sede hosi Sekretariadu Tékniku ba Administrasaun Eleitoral (STAE) ne'ebé nia akompaña, ho jornalista sira, bainhira "monu" kontajen sira hosi Díli.

"Ami hein to'o final", nia hatete bainhira, kompleta sentru votasaun ida-idak, hodi hamenus vantajen hosi votu sira ne'ebé partidu iha relasionadu ho munisípiu sira seluk.

Hafoin ne'e, liu tiha tuku 04:00 madrugada bainhira total provizóriu ikus konfirma ona vitória hosi Fretilin, Cipriana Pereira husik ona mensajen badak ida, hodi hatete ba Lusa katak liutiha tinan 10 iha opozisaun, partidu "kaer ona responsabilidade boot ne'e", loke "odamatan hodi nune'e bele serbisu hamutuk".

"Importante liu maka estabilidade ho dame", nia afirma.

Iha loron-segunda dadeer ne'e ambiente CNRT nian kontinua laiha konfiansa. Laiha ema ida maka hakarak asumi ka ko'alia kona-ba senáriu sira, hodi explika katak tenki rona prezidente, Xanana Gusmão, no hafoin ne'e maka foti desizaun interna.

Fonte sira hosi partidu admiti ona ba Lusa kondisaun ladún di'ak ne'ebé maka senti no ladún iha konfiansa ho rezultadu ba ema ne'ebé antes iha konfiansa maka'as ba vitória maka'as: dirijente sira partidu nian, inklui Xanana Gusmão rasik, antes promete ona iha kampaña ikus maioria absoluta ida loloos. Lakon ne'e la halo parte hosi sira nia planu.

Iha ema balun maka hatete katak buat hotu depende hosi konversa "katuas sira nian" - Xanana ho Alkatiri. To'o agora, no tuir konfirmasaun hosi dirijente sira hosi partidu rua ne'e ba Lusa, Alkatiri ho Gusmão seidauk ko'alia, karik tanba tenki iha dahuluk diálogu internu sira.

Maibé iha ema balun maka halo referénsia ba senáriu seluk. Reedisaun ida ne'ebé maka akontese ona iha tinan 10 liubá bainhira vitória hosi maioria relativu hosi Fretilin, CNRT hatán ho koligasaun ida ho forsa polítiku sira seluk, Aliansa hosi Maioria Parlamentar (AMP).

Iha Fretilin buat hotu hatudu katak "aban, loron-tersa, ka loron-kuarta" Komité Sentral sei hasoru malu hodi debate rezultadu sira no haree dalan sira tuirmai, inklui desizaun susar kona-ba sé maka sei sai nu'udar primeiru-minitru no ho partidu ne'ebé maka hakarak hetan apoiu.

Iha loron-domingu, Alkatiri hatete ona katak dalan nakloke ba ema tomak no liuliu ba Xanana Gusmão, nune'e karik senáriu dahuluk maka bele hanesan parseria entre sira na'in rua.

Hamutuk, Fretilin ho CNRT kontrola fatin hamutuk 45 iha Parlamentu, liu duké sufisiente hodi aprova buat hotu, iha kazu barak bele iha mós apoiu, pelumenus, hosi Partidu Demokrátiku (PD) ne'ebé nia líder, Mariano Sabino, defende ona, durante kampaña, Governu ida inkluzaun nian.

Hafoin kampaña maka'as ida durante fulan ida, hosi prosesu kontajen naruk no luta nian, oras 48 oinmai sei iha konversa barak hosi bastidor sira. Hosi konversa sira ne'e sei mosu kedas destinu hosi governasaun Timor-Leste nian.

SAPO TL ho Lusa | Foto@ Nuno Veiga/EPA