terça-feira, 25 de julho de 2017

FRETILIN Tenke Sura mós Xanana

PARTILHAR
DILI: Hafoin rezultadu presemináriu hasai, posibilidade boot rua mak tenke halo hodi bele forma governu. Halo koligasaun entre partidu FRETILIN ho CNRT ka forma governu inkluzaun.

Iha kestaun ne’e, partidu FRETILIN nu’udar mais votadu simples presiza konta mós Xanana Gusmão tanba kadeira ne’ebé hetan iha Parlamentu Nasionál labele garante maioria parlamentár ne’ebé forte.

Observadór polítika, Valentim Ximenes hateten, haree ba kadeira ne’ebé hetan partidu FRETILIN iha kadeira 23, partidu CNRT kadeira 22. Ne’e duni, prezensa maun Xanana importante hodi bele asegura maioria absoluta.

“Atu hetan maioria di'ak no forte sura mós maun Xanana. Katak programa CNRT bele tama, liuliu ida ne’ebé semellante”, tenik nia, via telefone, horisehik.


Tuir nia, partidu ne'ebé iha planu atu harii governu inkluzaun ne’e la'ós fasil, tanba pelumenus tenke manan maioria absoluta iha eleisaun parlamentár atu bele forma governu mesak.

Bainhira haree fila-fali ba kadeira iha Parlamentu Nasionál partidu boot rua FRETILIN no CNRT bele planeia modelu governu tuir sira-nia hakarak atu harii governu inkluzaun konforme akordu ne’ebé sira halo.

“Governu inkluzaun la'ós atu fahe kadeira, maibé bolu timoroan ne'ebé matenek mai hamutuk hatama sira-nia planu no programa ne'ebé semellante ho partidu manan ne’e atu bele implementa”, nia esplika.

Nia hatutan, ema ne'ebé la'ós partidu manan maioria nian bainhira envolve-aan iha estrutura governu, pelumenus iha aseitasaun ba programa ne'ebé governu atu implementa.

Kuandu lae, lalika envolve-aan tanba dala ruma bele impede mós programa ne'ebé atu implementa. Governu inkluzaun ne’e nia prosesu diferente ho governu koligasaun kuandu halo koligasaun ne’e fahe kadeira ba partidu sira ne'ebé hamutuk halo koligasaun. Tanba ne’e, dala ruma ida-idak bele halo nia programa polítika partidu nian hodi mai implementa, tanba ne’e bele impede servisu governu nian, maibé bele mós halo akordu partidáriu atu tau hamutuk programa hodi implementa.

FRETILIN-CNRT Mak Bele Garantia VII Governu

Entretantu, observadór polítika Camilo Ximenes hateten, atu garante mandatu VII Governu Konstitusionál, partidu FRETILIN no CNRT iha posibilidade boot hamutuk.

Tuir nia, partidu boot rua ninia programa kuaze hanesan, hotu-hotu ko’alia kona-ba oinsá atu dezenvolve setór ekonomia, infraestrutura, edukasaun, saúde no sira seluk tan.

“Ita haree kuandu FRETILIN no CNRT sira hamutuk ne’e bele garante ona mandatu VII Governu Konstitusionál to’o 2022”, dehan Camilo, iha UNTL, horisehik.

Nia haree fila-fila deklarasaun Xanana nian katak, la importa pozisaun ka kadeira maibé importante mak dezenvolvimentu nasionál bele hadi'a povu nia moris, entaun partidu rua ne’e bele akumula hotu matenek na'in sira atu bele kaer governu.

Nia hatutan, iha fenómenu polítika ne'ebé mosu hotu-hotu tau aas interese nasionál tanba presiza hotu-hotu hamutuk atu bele aselera dezenvolvimentu nasionál.

Independente
PARTILHAR

Author: verified_user

Publicação luso-timorense sem fins lucrativos

0 comentários: