terça-feira, 25 de julho de 2017

Fidelis Magalhães: PLP hakarak parlamentu "dinámiku" no opozisaun "saudável"

PARTILHAR
Númeru rua hosi Partidu Liberasaun Popular (PLP), forsa datoluk ne'ebé hetan liu votasaun iha lejislativu loron-sábadu iha Timor-Leste, hatete iha loron-segunda ne'e katak partidu la preokupadu ho governasaun maibé preokupadu ho kriasaun ba parlamentu "dinámiku" ida ho opozisaun ida "saudável". 

"Agora daudaun iha koligasaun ka la'e la'ós hanesa preokupasaun prinsipal PLP nian. Sira ne'ebé maka iha votu maioria, sira maka tenki desidi", afirma hosi Fidelis Magalhães iha entrevista ba Lusa.

"Ami nia preokupasaun maka oinsá dinamiza parlamentu foun ida ho polítika no polítiku sira ne'ebé di'ak no oinsá ami sei defende interese hosi ami nia apoiante sira no povu iha jeral. Ami la preokupadu ho modelu no formasaun hosi Governu foun tuirmai", nia afirma.

Frente Revolucionária do Timor-Leste Independente (Fretilin) manán ona eleisaun lejislativu sira iha loron-sábadu ho marjen ida votu rihun ida de'it, to'o hodi fó ba sira fatin hamutuk 23, liu fatin ida duké Congresso Nacional da Reconstrução Timorense (CNRT), ne'ebé hetan mandatu ba fatin 22, iha parlamentu ne'ebé iha fatin hamutuk 65.

PLP, ne'ebé lidera hosi eis-Prezidente Repúblika Taur Matan Ruak, estreia ho fatin ualu, halakon Partidu Demokrátiku (PD) ne'ebé hetan fatin hitu no Kmanek Haburas Unidade Nacional Timor Oan (KHUNTO) ho fatin lima.


Fidelis Magalhães, ne'ebé akompaña Taur Matan Ruak iha tinan barak nia laran - uluk hanesan xefe Uma Sivil Prezidente nian - hanesan númeru daruak iha lista partidu nian, okupa mandatu ida hosi mandatu ualu ne'ebé maka PLP hetan iha votasaun loron-sábadu nian.

Bainhira hatán ba Lusa kona-ba karik PLP sei aseita hodi halo parte hosi koligasaun ruma Governu nian, númeru rua hosi lista deputadu sira partidu nian ne'e hatete katak eleitor sira nia eskolla hanesan klaru, tenki respeita no nia insisti atu la senti preokupadu ho formasaun Governu.

Magalhães hatete katak falta nafatin "opozisaun saudável" ida hasoru "koligasaun ida ne'ebé konsege halibur forsa polítika tomak maibé uza ona unanimidade ba polítika ida ne'ebé laiha vantajen, ne'ebé ladún hanesan konstrutivu" ba nasaun.

"Ami nia ambisaun maka iha parlamentu dinámiku ida ho polítika ida no polítiku dinámiku sira ba Timor-Leste nia di'ak. Buat ne'ebé ami hakarak maka fó serbisu di'ak ida, polítika di'ak ida iha parlamentu. Oinsá salva polítika hosi polítiku sira ne'ebé tuir ha'u nia haree to'o ohin loron defende de'it interese partidáriu sira, hosi sira nia grupu no husik liu lei sira no mós laiha kondisaun sira hodi avansa", nia konsidera.

Nia hatete katak tama iha opozisaun "la signifika katak PLP sei la konkorda ho pozisaun tomak" tanba partidu hakarak "dezenvolve matenek no fasilidade hodi serbisu ho partidu tomak.

"Ha'u la haree opozisaun ida ne'ebé halo parlamentu sai hanesan adversáriu ida lahó justifikasaun. Ami hanesan duni rasional, ami hatene ho di'ak objetivu komun sira, ami iha ami nia estratéjia oinsá hetan ami nia objetivu sira", nia hatete.

Magalhães subliña katak eleitoradu lakohi fó maioria absoluta ba ema ida, "lakohi iha ema ida ka rua maka governa lahó alternativu sira" no nia hatete katak "hakarak polítika di'ak ida iha Parlamentu Nasional".

SAPO TL ho Lusa | Foto@ Nuno Veiga/EPA
PARTILHAR

Author: verified_user

Publicação luso-timorense sem fins lucrativos

0 comentários: