Dirijente Administrasaun Públika Labele Depende Ordem Demokrátiku

DILI, (TATOLI) – Dirijente administrasaun públika labele depende ordem demokrátiku maibé ka’er nafatin prinsípiu  meritu iha administrasaun públika.

“Agredese tebes ba kolaborasaun hosi Komisaun Funsau Públika durante tinan rua ho balun nu’udar dirijente ba instituisaun ida-idak no hanesan dirijente ordem burokrátika ba implementasaun polítika tarefa ne’ebé governu define maibé governu foun mai labele iha ordem demokrátiku iha administrasaun públika nia laran mezmu iha nia partidu mak manan iha festa demokrásia”, Primeiru Ministru, Rui Maria de Araújo iha intervensaun durante enkontru ho dirijente administrasaun públika ne’ebé organiza hosi Komisaun Funsaun Públika (KFP) iha Ministériu Finansa, Aitarak laran, kuarta (2/8).

Nia afirma, funsionáriu públiku la’os ema polítiku maibé halo servisu tékniku ho prinsípiu atu ka’er metin nafatin no respeita iha prosesu tranzisaun.

Servisu administrasaun públika importante katak hatene saida mak  halo no halo oinsá, hanesan eleisaun ne’ebé liu dadauk no prosesu deskonsentrasaun administrativa, maibé iha festa demokrásia ne’ebé hakat labele utiliza forsa ne’e hodi hafraka ordem burokrátika.

Kompeténsia iha área polítika ho jestaun hanesan osan mean ba konstrusaun Estadu no nasaun. Tanba ne’e, polítika bele hatene saida nia hakarak halo maibé laiha ekipa di’ak no jestaun sei hamósu komplikadu, tanba ordem polítika, ordem burokrátika inklui ordem demokrátika presiza mantein ho di’ak.

Tanba periódu tranzisaun ho ordem demokrátiku nian halo konfusaun iha ordem polítika no burokratika tanba ne’e labele depende ba afilisaun polítika maibé independentemente ema ne’ebé pretense partidu ida kuandu hatene halo servisu signifika nia iha meritu, kuandu iha meritu mak sai baze atu nomeia nia atu asume kargu diresaun sefia, funsionáriu públiku no kargu tékniku.

Hanesan ezemplu, hafoin eleisaun remata iha 22 jullu, nia konta, simu mensajen 50 resin kona-ba interese partidaria nian iha governasaun foun.

“Dala barak polítiku sira mak viola regra no sosiedade mós obriga polítika sira atu halo, ezemplu ha’u simu mensajen 50 resin hosi ema balun”, realsa nia.

Mensajen ne’ebé simu hatete: boa noite kamarada, ita nia votu iha oin ona, atu forma governu karik keta haluha ha’u. Enkuantu mensajen ida tan iha loron 1 agustu hateten nune’e, boa tarde maun, maun sira mak di’ak hela de’it ona, ita mak la’o hamutuk keta haluha ha’u nia oan sai netik funsionáriu públiku.

Oinsá sosiedade halo presaun ba polítiku sira, ne’e ilustra de’it katak bainhira asume kargu ho responsabilidade presiza determina pozisaun, kuandu hakarak tama polítika entaun bele tama polítika de’it maibé labele kahur sasan.

“Ha’u lee de’it ezemplu rua de’it tanba mensajen barak, oinsá sosiedade halo presaun ba polítiku sira, kuandu ba futuru ita boot sira hetan oportunidade iha ordem demokrátika atu sai lider karik sai hanesan referénsia”, katak nia.

Nia haktuir, agora iha faze tranzisaun, balun ativu iha partidu polítiku, direitu polítiku ida ne’ebé ema labele nega maibé hanesan funsionari tempu ba halo polítika durante kampaña maibé hotu tenke servisu hanesan funsionáriu públiku.

Independentemente hosi afiliasaun partidaria ne’e regra funsaun públika mak tenke hola medida, kuandu hotu respeita, nasaun bele transforma lalais.

Prinsipiu distribuisaun tarefa klara, polítiku sira halo polítika no burokrata sira implementa polítika, bainhira polítika sira intervene barak liu oinsá servisu bele la’o di’ak.

Jornalista: Zezito Silva | Editora: Rita Almeida

Foto: Primeiru Ministru akompaña hosi Prezidente Komisaun Funsaun Públika durante enkontru ho dirijente administrasaun públika ne’ebé organiza hosi Komisaun Funsaun Públika (KFP) iha Ministériu Finansa, Aitarak laran, kuarta (2/8). Foto Tatoli/Antonio Goncalves