Prezidente: Eleitoradu hakarak líder sira unidu iha governasaun

Iha loron-kuarta ne'e, Prezidente timoroan hatete ona katak eleitoradu hatudu ona, iha lejislativu loron 22 Jullu, katak hakarak uniaun hosi líder sira nasaun nian "hodi hetan dalan ida ne'ebé hametin governasaun di'ak".

Dalan ida ne'ebé ema timoroan sira fó nafatin nia konfiansa iha líder istóriku sira nasaun nian, hatete hosi Francisco Guterres Lu-Olo, iha mensajen ida iha vídeo ne'ebé maka ohin transmiti iha Timor-Leste.

"Ha'u iha fiar katak governu dahitu sei harii ho baze iha opiniaun oioin. Ita sei iha governu ida ho estabilidade governativu, ka, katak governu sei la'o tuir kontributu hosi partidu tomak ne'ebé reprezenta iha parlamentu nasional", hatete hosi Prezidente timoroan iha mensajen ne'ebé hato'o ba nasaun.

"Ha'u senti konvensidu katak partidu sira seluk mós sei fó nia kontributu. Ha'u fiar mós katak ita sei iha governu ida ne'ebé sei kumpri vontade povu nian", nia adianta.

Lu-Olo nia mensajen, ne'ebé sei transmiti hosi televizaun iha Timor-Leste, grava ona liutiha loron ida hafoin Tribunal Rekursu valida tiha rezultadu sira hosi lejislativu sira loron 22 Jullu nian, ne'ebé fó sai katak Frente Revolucionária do Timor-Leste Independente (Fretilin) sai hanesan partidu ne'ebé maka hetan liu votu.

"Ita nia povu la haluha kona-ba oinsá maka ita konkista ita nia independénsia, no sé maka lori ida ba independénsia. Povu fó nafatin konfiansa iha líder istóriku sira Mari Alkatiri, Xanana Gusmão ho Taur Matan Ruak", nia hatutan.

"Liuhosi eleisaun sira ne'e, povu husu ona ba líder sira atu iha uniaun hodi buka dalan ida ne'ebé hametin governasaun di'ak iha tinan lima oinmai", nia hatete iha mensajen ne'ebé nia felisita "povu doben Timor-Leste nian" no "líder polítiku sira no militante sira hosi partidu 21 nian" ne'ebé aprezenta ona votu sira iha loron 22 Jullu liubá.

"Ha'u fiar katak líder istóriku sira ne'e sei iha uniaun maski iha opiniaun ne'ebé la hanesan", nia hatutan.

Iha mensajen, Lu-Olo felisita Fretilin "tanba sai nu'udar partidu vensedor", no ba partidu haat sira seluk ne'ebé iha fatin iha parlamentu - Congresso Nacional da Reconstrução Timorense (CNRT), Partidu Libertasaun Popular (PLP), Partidu Demokrátiku (PD) ho Kmanek Haburas Unidade Nacional Timor Oan (KHUNTO).

Ba partidu sira seluk ne'ebé maka la liu hosi limiti 4% nian ba votu válidu sira, xefe Estadu agradese ona "maturidade polítika ne'ebé sira hatudu durante prosesu eleitoral tomak".

Prosesu eleitoral hatudu ona katak Timor-Leste iha "maturidade polítika (...) kapasidade hodi halo eleisaun justu, livre ho transparente" no vontade hodi "hametin dame no estabilidade iha momentu tomak", nia destaka.

"Ita hatudu ona vontade koletivu ida hodi hametin Estadu Direitu demokrátiku nian", nia konsidera.

"Prosesu eleitoral tomak hala'o ona tuir lei no regra sira demokrasia nian, iha ambiente ida dame no estabilidade nian. Ita bele konklui katak rezultadu hosi eleisaun sira ne'e hanesan manifestasaun hosi vontade povu nian", nia hatete.

Fiar katak "partidu tomak sei aseita" vontade ne'ebé hatudu hosi populasaun iha votu, Lu-Olo fó hanoin katak laiha partidu ida maka hetan maioria absoluta ka "kapasidade, tuir Konstituisaun, harii governu mesak".

Lu-Olo esplika ona katak iha loron-kinta sei "konvida partidu polítiku sira ne'ebé hetan liu votu hosi povu hodi okupa sira nia fatin iha Parlamentu Nasional".

Xefe Estadu konsidera ona katak enkontru sira sei hanesan vantajozu "hodi hetan dalan di'ak ida governasaun nian, tuir ho rezultadu eleitoral sira" no husu ona "kalma no hakmatek bainhira partidu sira buka soluasun ida ba governu foun".

"Dame no estabilidade la depende de'it hosi forsa sira defeza no seguransa nian. Depende hosi ita hotu. Ita kontinua hamutuk nafatin hodi fó prestíjiu ba Timor-Leste nia naran", nia hatete.

"Durante ita nia luta ba libertasaun nasional ita hatudu ona ba mundu ita nia korajen no firmeza to'o ita konkista independénsia. Ohin loron, ita hatudu prova ba mundu ba ita nia maturidade polítika ho síviku, no vontade demokrátiku nian", nia hatutan.

Fonte hosi Prezidente timoroan konfirma ona ba Lusa katka xefe Estadu sei iha enkontru sira, iha loron-kinta, ho líder sira hosi Fretilin, CNRT ho PLP, no iha loron-sesta sei hasoru malu ho lideransa hosi PD ho KHUNTO.

Antesipa ona katak CNRT, iha findesemana, sei halo konferénsia nasional ida, ne'ebé antes marka ba findesemana liubá, ne'ebé sei desidi pozisaun ne'ebé maka partidu sei hili iha formasaun Governu nian.

SAPO TL ho Lusa