Laiha Nomeasaun Polítika Ba Kargu Tékniku

DILI, (TATOLI) – Primeiru ministru, Rui Maria de Araújo fó hanoin ba profisionais saúde sira katak laiha nomeasaun polítika ba kargu tékniku tanba kargu ne’e halo ho baze ba méritu.

“Ita liu ona husi prosesu tranzisaun ba governu foun, ha’u hakarak halo klaru ba profesionál saúde sira hotu katak sei laiha nomeasaun polítika ba kargu tékniku tanba kargu ne’e halo ho baze ba méritu”, tenik nia foin lalais ne’e iha seremonia lansamentu sistema digitalizasaun saúde no inagurasaun klínika moras la daet iha Ospitál Nasionál Guido Valadares.

Nune’e mós nia informa, konteksu prosesu formasaun governu mai pozisaun polítika iha Ministériu Saúde ba kargu Ministru Saúde no Vise Ministru Saúde mak sei muda, pozisaun téknika sei la muda tanba halo ho baze méritu.

Nia konsidera, funsionáriu públiku ida labele hetan nomeasaun ho baze ba ninia afiliasaun partidária, no prinsípiu ne’e mak profisonais saúde tenke ka’er metin.

“Presiza haree Estadu no Nasaun ne’e ho seriedade, administrasaun públika funsiona ho baze ba méritu mós no la funsiona ho kalendáriu ka siklu polítiku ne’ebé iha”, afirma.

Hodi dehan tan, profesional saúde sira nia prokupasaun mak tenke, halo ona servisu tuir ona prinsípius no konhesimentus ne’ebé aprende ona ka lae, laos pertense ba partidu ida.

Nia mós subliña, profisionais saúde sira dalabarak iha sosiedade nia laran sei iha akuzasaun barak ba servisu maibé ida ne’e parte husi dezafiu ne’ebé nu’udar profesionál presiza atu infrenta no hamutuk fó prestasaun saúde ne’ebé di’ak liutan ba komunidade.

Hodi felisita profisionais saúde sira ne’ebé durante ne’e didika-án tomak atu halo prestasaun servisu ospitalares sai di’ak liu tan.

Jornalista: Julia Chatarina | Editora: Rita Almeida

Foto: Primeiru Ministru, Rui Maria de Araújo halo intervensaun iha seremonia lansamentu sistema digitalizasaun saúde no inagurasaun klínika moras la daet iha ONGV, Sesta (28/7). Foto: Midia Gabinete Primeiru Ministru (GPM)