sábado, 12 de maio de 2018

Eleisaun Antesipada La’o Ho Susesu

PARTILHAR

DILI, (TATOLI) – Diretór Jerál Sekretariadu Téknika Administrasaun Eleitorál (STAE), Acilino Manuel Branco, hateten prosesu eleisaun antesipada iha rai laran no diaspora ohin,  la’o ho susesu.

ʺProsesu eleisaun la’o di’ak tebes iha sentru votasaun no estasaun votu iha rai laran no rai-liurʺ, hateten Acilino ba jornalista sira iha Kaikoli, ohin.

Acilino dehan STAE seidauk simu keixa no reklamasaun to’o lokraik ne’e. Tuir relatóriu hosi Koréa Súl, Austrália iha tuku 16.00 finaliza ona prosesu kontazen, enkuantu Inglatera, Portugal no Irlándia sei iha prosesu votasaun.

Enkuantu, hosi rai-laran sentru votasaun no estasaun balun to’o tuku 16.00 votante kontinua forma iha fileira votasaun.

ʺIha rai-laran iha sentru votasaun balun sei kontinua iha prosesu eleisaun, liliu Dili tanba eleitór barak, maske tuir lei votasaun taka iha tuku 15.00, maibé kuandu to’o tuku 15.00 seidauk remata, iha ona formatura bele kontinua to’o hotuʺ, katak.

Kestaun seguransa, Diretór Jerál STAE ne’e hateten seidauk simu informasaun hosi PNTL ne’ebé mosu krime.

ʺAmi simu de’it telefone hosi PNTL iha suku ida iha Letefoho, munisípiu Ermera maka ai-monu ba estrada hodi impede prosesu transportasaun materiál eleisaun no husu apoiu bombeiros hodi tesiʺ, haktuir.

Nia dehan Radio Televizaun Timor-Leste, Empreza Públika no GMN TV, ohin kalan sei  halo transmisaun direta hodi fó sai rezultadu provizóriu apuramentu munisipál.

ʺIta hein tan oras rua nia laran hodi halo transmisaun direta kona-ba apuramentu provizóriu hosi munisipíu 12 no REAO inklui rai liurʺ, hatutan.

Jornalista: Agapito dos Santos | Editora: Rita Almeida

Imajen: Direitór Jerál STAE, Acilino Manuel Cabral, bainhira esklarese prosesu hahú eleisaun liuhosi konferénsia imprensa iha Kaikoli, ohin. Foto Tatoli/Rita Almeida
PARTILHAR

Author: verified_user

Publicação luso-timorense sem fins lucrativos

0 comentários: