sábado, 12 de maio de 2018

Taur Matan Ruak Konsidera Maturidade Povu Aas

PARTILHAR

DILI, (TATOLI) – Eis lider forsa armada, Taur Matan Ruak, konsidera prosesu demokratizasaun ne’e hanesan teste ida, mesmu ho lia-fuan kro’at hosi ulun boot partidu polítiku sira, maibé povu kontinua mantein dame ho hahalok edukadu no sivismu.

“Populasaun Timor edukadu no sivismu”, eis Prezidente Repúblika ba jornalista sira hafoin ezerse direitu votu iha eskola bazika filiál Metiaut, ohin.

Tuir Matan Ruak nia haree irregularidade kikoan mak akontese durante kampaña eleitorál, ida ne’e konsidera parte ida ba demokrasia. “Tanba ne’e presiza destinge entre lider ho xefe. Lider ne’e eduka ema sai matenek, xefe ne’e manda ema”.

Prosesu ne’e, hanesan lider nasionál, Taur Matan Ruak konfesa aprende buat barak tanba hanesan teste ida hodi haree to’o iha ne’ebé demokrasia bele funsiona.  “Imi haree violénsia lia-fuan maka’as maibé maioria populasaun ho komportamentu ne’ebé edukadu tebes, ho sivismu. Ha’u kontente loos”, katak tan.

Hirak ne’e hotu, hanesan lider hosi koligasaun partidaria Aliansa Mudansa ba Progresu (AMP) hakarak agradese ba militante, simpatizante no apoiante sira nian komportamentu di’ak durante kampaña eleitorál.

Matan Ruak konfesa prontu simu rezultadu hosi eleisaun ne’e ho dame. Tanba ne’e, nia husu ba militante, simpatizante no apoiante AMP atu simu rezultadu eleisaun ho pás no hakmatek.

Lider hosi Partidu Libertasaun Populár ne’e konsidera AMP manan ona, tuir loloos eleisaun antesipada labele akontese. “Ukun ba oitavu Governu ne’e ami mak forma ona, se la’e terlalu (demais)”, hatan ho hamnasa ba jornalista sira.

Jornalista: Rita Almeida

Imajen: Eis lider rezisténsia, Taur Matan Ruak, akompaña hosi ninia espoza, hatudu liman fuan ho sinál ezerse ona direitu votu iha eskola bázika filiál Metiaut, ohin. Foto António Goncalves
PARTILHAR

Author: verified_user

Publicação luso-timorense sem fins lucrativos

0 comentários: