sábado, 12 de maio de 2018

Horta Husu ParPol Simu Rezultadu Eleisaun Ho Dame

PARTILHAR

DILI, (TATOLI) – Premiadu Nobel ba dame, José Manuel Ramos Horta, husu ba lider partidu polítiku no partidu koligasaun atu simu rezultadu eleisaun antesipada ho dame no hakmatek ba povu.

“Espera partidu hotu, ida ne’ebé manan no lakon oinsá servisu hamutuk atu tinan lima ba oin hakle’an demokrasia nomós hadi’a ita-nian ekonomia”, hatete ba jornalista sira iha Lecidere, ohin.

Tanba ne’e, Horta husu ba lider sira iha partidu Frente Revolusionária Timor-Leste Independente (FRETILIN) kuandu manan eleisaun ne’e karik, konvida nafatin Partidu Demokrátiku atu forma governu da-ualu.

Eis Prezidente Repúblika ne’e mós husu atu lider sira iha FRETILIN kontinua fó liman ba Kay Rala Xanana Gusmão hanesan lider partidu Aliansa Mudansa ba Progresu (AMP) atu lidera nafatin kestaun fronteira marítima entre Timor-Leste ho Austrália nomós TL ho Indonézia.

“Fronteira marítima seidauk remata, iha ona akordu maibé seidauk rezolve problema ida atu dada kadoras mai Timor”, afirma.

Pontu importante ba FRETILIN, tuir nia mak diálogu ho ulun boot iha AMP, partidu sira seluk ho diálogu nasionál ne’ebé envolve sosiedade sivíl, arte-marsiál sira, hanesan promesa ne’ebé partidu ne’e halo durante kampaña eleitorál.

Nia mós agradese ba povu tanba hatudu ona maturidade polítika ne’ebé di’ak liu fali lider partidu polítiku balun. Agradese mós ba orgaun eleitorál sira tanba hatudu ona imparsialidade durante prosesu ne’e la’o.

Jornalista: Rita Almeida

Imajen: Premiadu Nobel ba dame, José Manuel Ramos Horta, bainhira halo intervista ho jornalista sira iha Jardin Lecidere, ohin. Foto Rita Almeida
PARTILHAR

Author: verified_user

Publicação luso-timorense sem fins lucrativos

0 comentários: