Opozisaun denunsia hipóteze ba iregularidade antes votasaun

Koligasaun hosi opozisaun timoroan, Aliansa Mudansa ba Progresu (AMP), denunsia iha loron-sesta ne'e, antes eleisaun lejislativu, saida maka konsidera hanesan "iregularidade oioin" no "krimi eleitoral" sira ne'ebé halo iha loron hirak ikus ne'e iha Timor-Leste.

Responsável oioin hosi AMP, inklui hosi komisaun jurisdisaun no 'media', fó detalle ba jornalista sira kona-ba saida maka sira afirma hanesan problema sira ne'ebé verifika iha distritu sira Aileu, Baucau, Bobonaro, Díli ho Rejiaun Administrativu Espesial Oecusse-Ambeno (RAEOA).

Kazu sira sei hato'o iha kesar ne'ebé maka AMP sei aprezenta iha órgaun eleitoral sira, Sekretariadu Tékniku hosi Administrasaun Eleitoral (STAE) ho Komisaun Nasional Eleisaun nian (CNE).

Kordenador-jeral AMP nian, Francisco Kalbuadi Lay, afirma ona katak koligasaun hakarak atu "eleitor sira la senti tauk no ba vota", no husu ona ba polísia ho autoridade lokal sira hodi iha "kuidadu máximu" no hametin katak eleisaun sei hala'o ho dalan "kredivel ho seguru".

Konferénsia imprensa halo ona iha loron daruak reflesaun nian, antes votasaun, hafoin fulan ida kampaña nian ne'ebé nakonu ho polarizasaun polítika, krítika maka'as sira, insidente sira - ida hanesan todan - no boatu oioin, propaganda ho notísia falsu sira ne'ebé maka fó sai iha rede sosial sira.

Pelágio Simões, hosi komisaun jurisdisaun AMP nian, hato'o ona detalle ba kazu oioin, inklui suspeita sira katak "militante sira hosi Fretilin [Frente Revolucionária do Timor-Leste Independente] tenta sosa votu sira hosi sidadaun na'in rua" iha Aileu, ka deskonfia asaltu ba militante ida AMP nia uma, iha Venilale (Baucau).

"AMP kondena no lamenta no husu ba polísia hodi investiga kazu ho dalan profisional, hodi garanti seguransa máximu ba populasaun hodi nune'e bele vota iha seguransa", nia hatete.

Responsável hanesan indika ona kazu sira seluk iha Kailaku (Bobonaro) hosi intimidasaun suspeita ba militante sira koligasaun nian no dúvida sira kona-ba boletin balun votu nian iha Kovalima, kestaun ne'ebé fó sai antes ona hosi AMP.

AMP akuza mós Fretilin (iha poder) hodi "sosa votu ho osan sira foos" iha zona Ramelau no Vila Verde no karik halo hela lista hosi populasaun lokal sira ne'ebé maka "promete ona apoiu" bainhira partidu manán iha loron-sábadu.

Koligasaun hamosu mós dúvida sira kona-ba kazu ida falta seguransa nian iha transporte material sensível iha Oecusse no denunsia ona situasaun ida ne'ebé "STAE tenki esplika" kona-ba alegadu mudansa iha fiskal sira ne'ebé destaka iha Bebonuk, Díli.

Vergílio Smith, dirijente seluk hosi AMP, hatete ona katak koligasaun simu informasaun sira katak STAE hanoin atu troka fiskal sira entre momentu votasaun ho kontajen nian.

Fatin votu sira ba lejislativu antesipadu, ne'ebé aprezenta forsa polítika ualu, loke tuku 07:00 loron-sábadu (oras lokal) no taka liutiha oras ualu.

SAPO TL ho Lusa