REDUZ DEZEMPREGU, JOVEN TENKE BARANI EMPREZARIU

DILI - Problema dezempregu (ema laiha servisu) oras ne’e sai problema ida iha ekonomia Timor-Leste tanba impaktu husi kresimentu populasaun ne’ebé kada tinan sempre aumenta. Atu hamenus dezempregu iha nasaun foun ne’e, la’os hein governu mak kria kampu servisu maibe oinsa joven sira iha inisiativa no dedika an atu sai emprezariu hodi ajuda governu redus numeru dezempreu iha rai laran. Tuir esperensia nasaun sira seluk, bainhira nasaun ida atu ba oin ho nivel propiedade (tingkat kemakmura) nian 3,5% total populasaun tenke sai emprezariu katak total populasaun iha Timor tokon 1,2, ema na’in 42.000 tenke sai emprezariu. Ema emprezariu na’in 42.000 kada empreza ida fo servisu ema nain 10  no dezempregu iha Timor laiha.

Ne’e mak hanoin husi emprezariu Rui Castro ba formandu sira bainhira partisipa iha serimonia Graduasaun Juventude iha Senai, Becora Segunda feira(13/04).  “Bainhira ita boot sira sai husi sentru formasaun iha buat rua tenke hili no deside ba ita bo’ot sira nia vida, premeiru ita bo’ot sira hili vida atu servi ba ema ou ita bo’ot sira deside vida atu ema servisu ba ita bo’ot sira no iha buat rua ne’e tenke hili ida, se hili rua hotu sei la susesu no tenke hili ida,” dehan Rui Castro, repezenta Prezidente Camara Comersiu Industria Timor-Leste (CCI-TL).

Tuir Rui katak  atu sai emprezariu iha Timor ne’e simples no la susar importante joven sira brani atu oinsa sai emprezariu. “Naran ita boot sira brani,  servisu ba ema diak maibe ita sai pekerja fali no ema manda ita maibe ita fo servisu ba ema  ita manda ita nia an no ita konsege ajuda no ita bo’ot sira kosege kria kampu servisu no ema servi ita bo’ot sira ita bo’ot sira ajuda SEPFOPE, Se ita bo’ot sira sai ba buka servisu hotu entaun ita bo’ot sira kria todan hela ba iha SEPFOPE tanba ne’e mak Camara Comersio Konvida ita bo’ot sira atu sai imprezariu”, katak Rui.

Rui afrima katak Emprezariu bo’ot sira ne’ebé iha mundu oras ne’e susesu sira hahu ho negosiu ne’ebé mak sira hatene tanba ne’e liu husi formasaun ne’ebé faslita husi SEPFOPE nudar dalan ida oinsa bele hamosu hanoin hodi bele sai emprezariu iha TL. Nia dehan atu sai  sai emprezariu la presiza mehi osan ne’ebé bo’ot liu, labele mehi hakarak buat ne’ebé bo’ot liu hahu ho ki’ik maibe importante bei-beik no bei-beik. Tan ne’e atu realiza mehi ne’ebé mak iha importante governu tenke hola parte iha prosesu hodi fasilita joven sira bele atinji numeru 42000 no bele redus numeru dezenpregu iha TL.

“SEPFOPE ajuda ita bo’ot sira ona, se bele iha tan inkobator bisnis bele fasilita joven sira ne’e sai imprezariu diak los, se SEPFOPE konsege ona halo akordu ho banku bele fo kreditu ba maluk sira ne’ebé servisu iha korea i agora hatama osan bo’ot mai iha Timor-Leste ida ne’e buat ida ne’ebé mak sangat luar biasa, Se atu sangat luar biasa fali tan bainhira governu tenke aloka kreditu ruma atu bele kria sira nia empreza, ne’ebé oinsa atu halo, se governu halo akompanamentu ba ita bo’ot sira para bele sai emprezariu ho fundus ne’ebé governu prepara atu aprende oinsa bele foti hodi bele selu fali iha banku, ita bo’ot sira bele sai emprezariu ne’ebé diak,”sujere Rui. Tuir nia katak fromasaun ne’ebé SEPFOPE fasilita sai nudar dalan ida hodi redus sasan importasaun ne’ebé mak tama iha Timor-Leste nomos bele redus ona numeru importasaun traballadores sira husi rai liur. 

“Se ita boot sira iha ne’e aprende kona ba kustura (suku roupa) se sentru formasaun hatama deit makina kustura mai, hatama deit hena fo ba ita bo’ot sira suku hodi hatais I depois sira fo treinamentu ne’e luar biasa, tanba governu nia funsionariu nia farda bar-barak duke sosa husi Indonesia no osan ba iha Indonesia, tanba sa la fo ba iha ita bo’ot sira mak suku no ida ne’e mos ita bo’ot sira bele sai Emprezariu ona, se mak halo ida ne’e so governu  hahu husi buat ne’ebé hau temi tiha ona governu liu husi SEPFOPE iha lei aprovisionamentu fo dalan tiha ona para obriga emprezariu sira fo servisu ba iha timoroan maibe dala barak lei ne’e la uza ho diak, dala ruma uza karik maibe inspesaun ladun hare” Dehan emprezariu ne’e.

Nia klarifika katak baze ba iha lei aprovisionamentu ne’ebé mak iha hodi obriga emprezariu rai laran fo servisu ba timoroan sira bazea ba iha projektu ne’ebé governu fo maibe laiha tenke obriga osan Timor-Leste nian sai hotu ba iha nasaun liur. “Se emprezariu hotu hotu ne’ebé mak projektu husi governu, husi pengadaan, husi kontruksaun manan projektu kada tinan-tinan halo reinvestimentu katak loke oportunidade ba ema servisu maibe ida ne’e laiha no manan kontraktu husi governu osan timor nian ba hare ema husi jawa no Xina, ita nia maluk sira sai  husi sentru formasaun esforsu an buka servisu,” kestiona Castro.

Nia husu ba governu liu liu SEPFOPE tenke halo inspesaun rigoroju hodi bele obriga emprezariu rai laran bele fo servisu ba iha timoroan sira. “Iha emprezariu fo servisu ba ema atus rua to’o rihun tanba emprezariu balun labele, lalika brani deit atu servisu ba ema maibe tenke brani sai emprezariu, se ita hare iha Dili laran tomak Xina sira bele fa’an sasan tanba sa ita bo’ot sira la brani, ita hare katak ema balun mai deit ho vista turista sai emprezariu tanba aproveita orsamentu estadu Timor nian tanba sa ita bo’ot sira tauk sai,”Rui enkoraza. Nia husu ba joventude sira atu labele lori sertifikadu buka servisu maibe lori sertifikadu atu kria servisu tanba bainhira buka servisu mak aumenta servisu ba iha governu no wainhira kria servisu sei ajuda governu hodi hamenus problema iha nasaun foun ne’e. (BT)

Business Timor