PM – Atu Lori Fila Eis Ministra Emilia, Presiza iha Akordu Extradisaun

DILI (ANTIL) - Relasiona ho kazu eis Ministra Emilia Pires, Primeiru-Ministru (PM), Rui Maria de Araújo hateten, Governu laiha meiu atu lori fila tanba Estadu Timor-Leste (TL) seidauk iha akordu  extradisaun ho país hotu, nune’e alternativa ne’ebé iha mak boa vontade husi akuzada atu fila  mai TL.

Primeiru-Ministru iha enkontru informal ida ho media sira iha Palásiu Governu, Tersa (03/01/2017) informa, tribunal mak iha kompetensia atu foti desizaun, ne’e duni tribunál deside tiha ona iha instánsia dahuluk maibé ema ne’ebé akuzada sei halo rekursu no rezultadu mak sei determina.

Primeiru-Ministru afirma, sidadaun timor oan ruma ne’ebé oras ne’e daudaun hasoru justisa maibe iha estranjeiru bele prosesa maibé atu lori mak susar ituan tanba seidauk iha akordu extradisaun ho país sira seluk”.

Rui Maria de Araújo esplika, akordu extradisaun signifika sé iha sidadaun ruma ne’ebé Tribunál deside katak nia sala no tenke tama prizaun maibé momentu ne’e nia laiha Timór, exemplu kazu eis Ministra Finansas nian, tanba iha Portugál, TL tenki iha akordu extradisaun ho Estadu Portugues hodi bele fasilita akuzada fila mai Timor Leste.

Tamba ne’e wainhira seidauk iha akordu extradisaun entaun alternativa mak boa vontade husi akuzada. Alternativa ne’ebé ita iha agora ne’e, boa vontade husi ema ne’ebé akuzada para atu fila. Wainhira iha karik tentativa atu tama mai iha Timór, entaun ida ne’e, klaru ké Tribunál sira wainseidauk iha akordu extradisaun, PM subliña. (Jornalista: Maria Auxiliadora/ Editor: Alberto Alves)

Foto: Primeiru-Ministru (PM), Rui Maria de Araújo. Foto. ANTIL/António Gonçalves, Tersa, 03/01/2017.