quinta-feira, 9 de março de 2017

EFEITU SEKSU LIVRE HIV-SIDA HAMATE ONA EMA 80

PARTILHAR
Vokal Point ba tratamentu Kuidadu no Suporta Nasional AIDS Program Ministeriu Saude Dra.Carla F.Franco da Silva,informa katak, total ema ne’ebé mak agora dadauk afeta moras virus HIV-SIDA hamutuk 642, hamate ona ema 80 ona.

Husi numeru moras refere ninia impaktu bo’ot ba ema ninia vida, tanba ne’e husu ba joven sira atu nune’e labele halo relasaun seksual ho livre.

Relasiona ho problema refere Komisaun Nasional Kombate HIV-SIDA Timor Leste hala’o sosializasaun informasaun kona-bá virus HIV-SIDA ba estudante Eskola Tekniku Vokasional Hospitalidade no Turismu Becora, ho objetivu atu prevene no antisipa virus refere.

“Ha’u husu ba estudante sira hotu katak,labele halo relasaun seksual livre ou arbiru,tamba wanhira ema ho virus HIV mak toba ho ema diak bele daet liu husi relasaun seksual,ema ida halo tato uza daun ida  no mós bele transmite liu husi ran ba kanek ne’ebé iha ita nia isin,”afirma Vokal Point ba tratamentu Kuidadu no Suporta Nasional AIDS Program Ministeriu Saude, Dra.Carla F. Franco da Silva, ba Jornalista sira iha ETV Hospitalidade no Turismu Becora Dili, Tersa (08/03/2017).

Moras refere ninia impaktu bo’ot teb-tebes, tanba  husu liu-liu ba sira ne’ebe mak harii ona uma kain tenke fen ho laen tenke respeita malu labele halo relasaun seksual ho ema seluk.

Nia haktuir, pasiente ne’ebe mak hetan ona virus HIV/SIDA ativu halo tratamentu no hemu aimoruk ho naran Anti Retro Viral (ARV) iha Hospital Nasional Guido Valadares no Klinika Bairo-pite hamutuk 200 resin, pssiente sira ne’e mai husi munisipiu 12 inklui REAO.

Nia realsa,virus HIV-SIDA labele kura, tamba virus ne’e ataka tiha ona ema nia kodekinetik no nia iha imunidade ne’ebé sei labele kura,maibé hemu aimoruk ho naran ARV ne’e atu minimiza virus ne’ebé mak iha isin.

Iha fatin hanesan diretor prevensaun no edukasaun Komisaun Nasional Kombate HIV-SIDA Timor Leste, Atanasio de Jesus, husu ba estudante eskola tekniku vokasional hospitalidade no turismu Becora, atu kontrola an nafatin para bele dook husi moras HIV/SIDA.

Nia dehan, media Sosial (MedSos) hanesan facebook (FB) ninia influensia bo’ot dala balu labarik estudante sira utiliza sala la hare no lee konaba siensia nian, maibe loke fali pornografia no fotografia ne’ebe la merese lori labarik sira ninia hanoin ba at no hodi halo seksual livre.

Tanba ne’e iha oportunidade ne’e Diretor Ensinu Tekniku Vokasional Eskola Hospitalidade no Turismu Becora, Charles Fatima Guterres, haktuir, fahe informasaun konaba moras HIV/SIDA ne’e importante.

“Ami Ensinu Tekniku Vokasional Eskola Hospitalidade no Turismu sente orgullu tebes,tamba liu husi programa ida ne’e bele tulu ita nia estudante sira no ba ita nia oan sira liu-liu ba futuru Timor nian para sira bele hatene lalaok moras virus HIV-SIDA atu nune’e sira bele halo prevensaun ba sira nia an no antes moras ne’e hadaet ba ema,”haklean Diretor eskola ne’e. tos

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: