MARI ALKATIRI : UZA OSAN ESTADU HARII PARTIDU, NE’E KORUPSAUN

Sekretáriu Jeral Partidu FRETILIN, Mari Bin Amude Alkatiri, hateten katak, uza osan Estadu nian atu halo kampaña durante tinan 5 hodi harii partidu ne’e, korupsaun bo’ot.

“Ema dehan, atu sai Prezidenti Repúblika,  tenki ema independenti ida, agora ho prátika ita haree, sira sai tiha Prezidenti Repúblika,  aproveita tinan lima hodi halo kampaña uza osan povu nian atu halibur ema hodi harii partidu foun,”katak Alkatiri iha nia intervensaun ba loron kampaña ba da lima (5) kandidatu Prezidenti Repúblika, Francisco Guterres Lu-Olo nian ne’ebé hala’o iha Munisípiu Ainaro Vila, Tersa (02/03).

Maske nunee Presidente Team Suksesu kandidatu Presidente Republika, Francisco Guterres ‘Lu-olo nian, Mari Alkatiri, la mesiona ema nebe mak sai tiha Prezidente Repúblika pois harii fali Partidu.

Alkatiri hatutan, agora ema ida mak iha partidu ona, mak sai kandidatu ba Prezidenti Repúblika, atu nune’e bele sai Prezidenti Repúblika ba povu tomak. Tanba Lu-Olo iha ona partidu, entaun nia  la presiza ona atu uza fali nia pozisaun hanesan Prezidenti Repúblika, hodi uza osan Estadu nian prepara kondisoens atu harii partidu foun.

“Prosesu uluk tau ita ba hamutuk tanba ita iha inimigu ida,  atu kore Timor Leste husi domisaun estranjeiru.Tanba ne’e, Prezidenti Repúblika  tenki servisu hamutuk ho Governu no Parlamentu Nasionál atu halo lei hodi define didiak, saida mak los no saida mak korupsaun.

Ida iha rai ida ne’,e ita halo korupsaun , mas ita hanoin la’os korupsaun karik, tanba korupsaun ne’e dala barak, ita uza osan Estadu atu halo politika ba ita nia aan rasik, ne’e korupsaun, ita uza osan atu halo kampaña atu harii partidu, ida ne’e korupsaun,” katak Alkatiri.

Nia haktuir, agora  dada’uk ne’e, prosesu ida atu kore povu husi mukit, no atu kore povu husi kiak, ne’ebé uluk  luta ba libertasaun nasionál.

Alkatiri afirma, bainhira restaura tiha independensia, iha tinan 15 ne’e nia laran, la’o sidi ba mai hela.

“Iha 2009, bainhira ami hotu hamutuk, ba kari aifunan iha tasi ibun Farol, hodi fó omenzan ba Nicolau Lobato, iha ne’eba mak ha’u hateten, tinan 10 tenki sai tinan ida atu halibur fali ita, para ita hamutuk hametin paz no hametin estabilidade, haburas demokrásia hodi hala’o dezenvolvimentu iha rai ne’e. No Xanana dehan, ha’u kompriende,” informa Alkatiri.

Nia haktuir, husi ne’e ba oin, sira  sempre ko’alia atu buka dalan di’ak liu ba povu, no ba rai doben Timor Leste ne’e. 2012, lolos buat ruma atu akontese, maibé lideransa sira sidi iha fatuk ida, tanba Xanana ho CNRT ba apoia kandidatura seluk.

Nia salienta,  Lu-Olo atu sai Prezidenti Repúblika ho objetivu ida de’it mak, atu liberta povu ida ne’e husi kiak no mukit. Tanba ne’e, Alkatiri dehan, nia ho Xanana sai team susesu ba Lu-Olo no, hodi husik Xanana Lu-Olo ba tur iha Aitarak Laran.

“Ha’u ko’alia reprezenta mós Xanana, ida ne’e laiha duvidas, laiha tan ema FRETILIN ida atu mai ko’alia iha ne’e, tanba ha’u mak Prezidenti team Susesu, no  Xanana mós team susesu. Ha’u ko’alia hanesan ne’e tanba isu-isu barak ona, ida ne’e la’os kampaña legistlativa, ha’u mós la ko’alia iha ne’e, tanba ha’u Sekretariu Jeral, maibé ha’u Prezidenti team susesu,” relata Alkatiri.

Nia esplika, unidade ne’ebé mak sira hetan dadauk ne’e, la’os atu gaba’an, maibé unidade ne’e  hahú husi Xanana ho Alkatiri.

“Ami nain rua, ami kole ona sokar malu, ami dehan, tempu ona atu ita servisu hamutuk. Ha’u bele krítika Xanana, mas ha’u sempre dehan, saida mak nia hakarak ba povu ida ne’e, hanesan mós ha’u hakarak. Dalan mak bele lahanesan atu to objetivu ida ne’e, maibé hakarak ida de’it. Ida ne’e tanba saida, ami mai husi abut ida de’ti,” katak Alkatiri.

Nia salienta, Xanana harii partidu CNRT tanba atu kontribui ba haburas tan demokrásia iha rai ida ne’e, maibé nia la hariii CNRT atu hamate FRETILN.

“Balu agora dehan atu raut, lahatene atu raut fatuk ka, raihenek ka saida los,” esklarese Alkatiri.

Nia dehan, Lu-Olo hatene lolos saida mak sistema iha  TL ne’e, no nia sei defende TL ida ne’e. ema seluk foin sai de’it kandiatu ba Prezidenti Repúblika, hakarak ona atu muda konstituisau, ida ne’e dehan, foin sai kandidatu Prezidenti Repúblika, hakarak atu halo golpe ona, tanba la’os Prezidenti Repúblika nia kompetensia atu muda konstituisaun.

Lu-Olo sei lahensan ne’e, tanba nia mak aprova konstituisaun ida ne’e, laiha ema ida atu kompriende di’ak liu konstituisaun TL ida ne’e, liu Lu-Olo.cos

Jornal Nacional Diário