PREZIDENTI REPUBLIKA IHA DEVER VIZITA SUKU-SUKU

Kandidatu prezidenti republika periodu 2017 ba 2022, António da Conceição ‘Kalohan’ hatete sai prezidenti republika iha dever vizita suku sira hodi rona aspirasaun hotu.

Kandidatu ho numeru sorteiu ualu (8) hatete lia hirak ne’e bainhira halo sorumutu ho media ho tema ‘kafe ho jornalista’ iha Hotel Vila-Verde, Segunda (6-3-2017).

Nia dehan ita hare prezidenti republika Taur Matan Ruak  nia vizita suku hodi rona aspirasaun povu, ida ne’e ita konsidera fali dehan ne’e laos papel prezidenti, papel prezidenti nian lolos ne’e mak ida lao ba rai liur ne’e.

“Hau sai prezidenti republika ba rai no povu ida ne’e ka ba sira ne’ebe iha rai liur ne’eba. Se ba rai no povu ida ne’e nia iha papel ida atu lao hodi rona povu nia lian no hatutan ba Governu atu toma medidas,” dehan António.

Nia hatutan Parlamentu Nacional dehan nia an ne’e reprezenta povu, los reprezenta emtermus konfiansa, maibe dala barak lareprezenta povu nia hanoin.

Tanba bainhira sira koalia konaba vantajem grupu ninian, ne’e sira nia lian ne’e hamutuk ida deit, maibe se kualia fila fali ba interese povu ninian, tanba deit lahan malu ho partidu nian impozisaun sai, izolamentu halo ba malu, ida ne’e mak naran reprezentasaun povu?

Antes ne’e iha loron dahuluk kampaña kandidatu Francisco Guterres Lu-olo iha Ermera, prezidenti partidu CNRT, Kay Rala Xanana Gusmão husu apoiantes no militantes atu vota ba kandidatu ho numeru sorteiu 2, tanba nia sei sai prezidenti republika ne’ebe reprezenta Estadu ba mundu laos ba suku-suku.

“Ita fo fiar ba nia tanba ita hatene katak bainhira nia sai prezidenti da republika, nia sei sai prezidenti ida ne’ebe lolos katak nia mak fo imajem ba unidade nasional, labele fahe ema, nia tenki hamrik iha ne’eba metin ba povu tomak, organizasoen, politikas no non-politikas, hamutuk no ba rai no povu ida ne’e. Prezidenti mak reprezenta ita nia estadu ba mundu, laos ba suku-suku,” dehan Kay Rala Xanana Gusmão iha ninia diskursu, wainhira marka prezensa iha abertura kampaña kandidatu PR Francisco Guterres Lu’olo iha postu administrativu Gleno, munisipiu Ermera, Sesta (3-3-2017).nty

Jornal Nacional Diário