Koreia do Norte bandu sidadaun Malázia hotu sai hosi nasaun

Koreia do Norte iha ohin anunsia katak bandu  sidadaun Malázia nian atu sai hosi nasaun to’o  kazu omisídiu meiu-irmaun líder norte-koreanu iha Kuala Lumpur " bele  rezolve  ho adekuadu".

Ministériu Negósiu Estranjeiru Koreia do Norte notifika embaixada Malázia iha  Pyongyang katak lapermite malaiu ruma sai iha nasaun, to’o  garante seguransa sidadaun norte-koreanu iha  Malázia.

Anúnsiu ne’e mosu loron ida hafoin Pyongyang deklara embaixadór hosi  Malázia iha Koreia do Norte 'persona non grata', ho reprezália ba espulsaun ninia embaixadór iha Malázia, Kang Chol, ordenadu hosi Kuala Lumpur iha  sábadu liubá hafoin ninia krítika ba investigasaun omisídiu Kim Jong-nam, meiu-irmaun Kim Jong-un.

Kim Jong-nam, meiu-irmaun hosi  líder Koreia do Norte, Kim Jong-un, hetan  assassiniu, iha  13 fevereiru, hosi feto na’in rua ne’ebé, tuir autoridade malaia, lansa venenu VX kontra ninia oin, provoka mate hafoin minutu balun.

Iha kinta-feira, emissáriu ida hosi Koreia do Norte haruka ba Malázia hodi  reklama kadáver Kim Jong-nam no nega nia hetan oho ho  veneno no atribui ninia mate atake korasaun.

Pyongyang defende katak mate hetan kauza hosi atake kardíaku no akuza autoridade malaia konspira ho ninia inimigu sira.

SAPO TL ho Lusa