quarta-feira, 8 de março de 2017

LERE: UNITAL HARII BA POVU AILEBA NIA OAN

PARTILHAR
Fundador Universidade Oriental Timor Lorosae (UNITAL), Lere Anan Timur hatete katak,  universidade UNITAL hari’i ba povu aileba nia oan sira.

“Hari’i univeridade ida ne’e hari’i ba ema kiak nia oan, tanba estudante sira ne’e kuaze mai hotu husi foho, ne’e quer-zer ema to’os nain sira nia oan, ema karau atan bibi atan nia oan ho ema kiak nia oan mai iha univeridade ida ne’e,”hatete Lere Anan iha nia diskursu hafoin halao abertura ba formasaun estudante foun tinan akademico 2017 iha Salaun Universidade Oriental Becora-Dili, Tersa (07/03/2017).

Lere Anan hatete, ohin loron ema hotu hatene katak, TL nasaun soberanu ida kiik kasian iha mundu rai klaran, mais sidadaun hot-hotu ne’ebe moris iha Nasaun TL direitu hanesan.

“Ita la sukat ema kiak ho riku, ema matenek ka beik, ita hanesan deit, ita hotu sidadaun Timor oan, tanba ne’e imi mai iha ne’e, imi mesak to’os, karau atan nia oan no bibi atan nia oan ema kiak nia oan, neduni  imi mai atu prepara ba futuru, atu sai futuru Timor ninian,”afirma Lere Anan Timur.

Lere Anan Timur hatutan, universidade UNITALne’e espesial, tanba universidade ida ne’e ema kiak nia oan lori osan hodi kria fali kondisaun ba imi an.

“Ha’u husu ba imi estuda didiak, universidade fundasaun sei halo efsorsu hot hotu oinsa para imi bele sai Timor oan ne’ebe maka matenek, Timor oan ne’ebe maka intelektual Timor oan ne’ebe nasionalimu Timor oan ne’ebe maka patriota,”haklean Lere.

Tanba tuir Lere Anan katak,  Timor ohin loron matenek barak, mais ohin loron nasionalista dalaruma uitoan,  neduni universidade tenki hanorin hadomi  nasaun,  hadomi povu, hadomi profisaun no kareira.

Iha biban ne’e, Lere Anan Timur afirma liu tan katak, nudar fundador ba universidade UNITAL, hato’o parabens ba ema sira ne’ebe  servisu hamutuk ho nia durante tinan 15.

“Ha’u nudar fundador ba universidade ida ne’e, ha’u hato’o parabens ba alin sira ne’ebe servsiu hamutuk ho ha’u tinan 15 nia laran, ohin bele simu tan estudante foun, parabens tanba imi nia esforsu, imi nia sakrifisiu, pasensia konprensaun ho imi nia matenek,”tenik Lere.

Iha okajiaun ne’e, Vise Reitor III, Asuntu Estudantil Ricardo da Costa hatete,tinan ida ne’e, UNITAL simu estudante 1000 resin, maibe estudante nee’be mak tuir orientasaun hamutuk 832.

“Tinan ne’e ami fo formasaun ba estudante durante loron rua, iha loron premeiru iha universidade, no iha rua, iha fakuldade para kohese diak liu tan esturutura fakuldade nian, nune’e mos sira bele hatene sistema lalaok aprendesiajen fakuldade nian,”esplika nia.

Nia dehan, estudante sira agora dadaun tuir orientasaun ne’e maiorai mai husi munisipiu 11, inklui Regiaun Autonom Oecusse no Dili.eni

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: