Ita Nia Maluk No Belun Ema Xina Timor Sira

PORTO (TATOLI) - Hosi Madre Lúcia Soares, canossiana, há’u simu notisia tirste ida, katak señora Elsa Maria Babo Alves Lay husik tiha ona mundu ne’e. Atan há’u hato’o “sentidos pêsames” ba Oan Bety no Pedro, no ba família sira.

Iha rai doben Timor Loro Sa’e, ema barak hosi suku no kultura oin oin  mak moris iha nebe’bá. Iha Timor, iha raça oin oin mos: metan, mutin, mestisu, etc. Hori uluk hori wa’in ema xina moris iha Timor. Ita bele dehan, maluk xina timor, uluk kedas halo parte ba POVO/BANGSA Timor Lor Sa’e.

Tuir istória, ema xina sira tama ilha/pulau Timor iha “século XVI”. Iha tempo neb’ebá, ema xina ba hosi Macau saé ró-ái ba Timor atu halo kontratu, liu liu sosa ai-kemeli (sândalo). Tuir mai iha tinan rihun ida no atus hitu ba oin, sira mos tama “praça Dilly”. Bainhira sékulu XIX remata, ema xina barak iha ona Kolónia de Timor. Barak mak ba hosi Cantão (Guadong), Macao, Hongkong no Singapura .Hahú tinan rihun ida atus sia ba oin, xina balu sosa rai no halo uma iha Dili, Likisá, Laga, Lautem…T’o funu japonês tama Timor, praticamente, sira iha komunidade boot iha Díli, Maubara no Baucau. Hahú tinan 1946 ba oin, maluk xina sira loke loja iha Posto Administrativo hotu hotu. T’o 1975, iha Província Timor Português laran, sira mak domina iha área komérsiu no transportes. Iha postu  isoladu (terpencil) maluk xina sira tama hodi loke joja atu fa’na sasan no sosa hare, bátar, kopra, karau kulit, bua, no buat seluk tan; iha fatin balu, sira  no loke restaurante, no hahú karreira atu tula ema ba Dili.

Iha tepu kolonial, ita emar timor sei beik, moris iha nakukun laran. Iha tempu ne’ebá ita hetene deit mak sai liurai; ita nia lisan mak futu-manu, halo estilu, gasta osan no balada ba barlaki, hakoi mate, no  halo uma lulik. Ita la heten fila liman hanesan loke loja, hala’o komersiu, halo  serbisu ba importasuan no exportasaun hosi Dili ba Singapura ka Hongkong. Buat sira n’e, maluk xina sira mak hala’o.

Iha tempu funu laran (1975-1999), maluk xina sira mos terus. Balu mate iha dezembru 1975. Balu, sai ba liur (Australia, Macau, Portugal), maibé balu hela metin nafatin iha Timor Loro Sa’e. Barak mak terus tan ba bapak ka militar indonesia sira explora no  sisi atu fó osan no sasan.

Sira ne’ebé ba Austrália, buka atu tulun timor oan sira nia luta hodi haruka osan. Há’u rasik ba Sydney, Melbourne no Darwin, sira organiza jantra atu halibru  osna hodi haruka ba Timor.

Ita tomak rona katak iha Same iha maluk xina ida naran Akoe Leong ne’ebé tula Komandante Xanana to’o Balibar. Xina balu tulun amo lulik sira, hanesan maluk xina Aliku, iha Kota Lospalos; maluk xina señora Elsa Babo Lay ho nia kaben, iha kota Ermera. Iha Sidade Dili laran maluk xina sira tulun ita Timor ho sira nia toko no bengkel, hanesan xina Akan, iha Akadiru-Hun; maluk xina Wilianm Singh o nia família, iha Toko UD Timor, oras  ne’e Toko “Liberdade”, no sira seluk tan.

Ikus ne’e, iha Timor-leste, ema harii monumentu ba horoi balu; ema fó naran ba herói balu iha sidade Dili laran. Governu fó kondekorasaun ba ema ne’ebe defende Timor nia direito.

Maluk xina, ho sira nia serbisu, sira mos tulun timor iha planu dezenvolvimetu no komersiu…Bainhra mak ita harii netik monumentu ida ba Xina Timor oan? Bainhira mka iha tau ka fó naran ba liuron ka estrada sira ho maluk xina timor nia naran? Ita hein, iha loorn boot, Governo TL mos bele fó netik kondekorasuan ba maluk xina timor sira.

Porto, 1 de Junho de 2017.

Dom Carlos Filipe Ximenes Belo

Foto: Dom Carlos Filipe Ximenes Belo