Taur: Xanana-Alkatiri La Liga Hau

DILI - Prezidente Partidu Libertasaun Popular (PLP), Taur Matan Ruak dehan, Ministru Planeamentu Investimentu no Estratéjiku (MPIE), Kay Rala Xanana Gusmão ho Prezidente Autoridade Rejiaun Admnistrativu Espesial Oe-Cusse Ambeno (RAEOA) Mari Alkatiri agora ses an hosi nia.

“Uluk ha’u sei prezidente ha’u krítika oituan maun Xanan ho Maun Mari, sira na’in-rua la’o dodook de’it la besik ha’u. Ha’u halo imbuskada ba sira nain rua nia dalan mos sira nain rua buka ses-ses de’it,” dehan Taur liuhosi nia diskursu iha konsolidasaun Partidu PLP nian iha Bekora Au-Hun Dili, Domingu, (28/05).

“Imi mos hakarak halo tuir ida ne’e labele, mas tenke hateke ba mata laran ida ne’ebé maka la di’ak  ne’e tenke dehan la di’ak, ita tauk saida.

“Mas ses fali ba ida ne’e halo saida, mas tuir loloos ne’e mudansa mai hosi ita nia hanoin, ne’ebé hanoin lalao mudansa mos la iha, hanoin iha mudansa,” dehan.

Iha fatin hanesan observador polítika  hosi Universidade Nasional Timor Lorosa’e (UNTL) Camilio Ximenes hatete kona-ba relasaun entre líder antigu sira, katak, laiha aman ida hanoin atu oho fali nia oan, no la iha maun ida hanoin atu oho nia alin tanba ne’e buat sira ne’e bele mosu maibé hanesan ne’e hanesan iha problema mental.

“Iha públiku  sira bele la fó  oin ba malu maibé ita lahatene iha kotuk ne’e tanba ita mos lalao ho sira, tanba ne’e sira sei konsidera malu hanesan maun alin no aman no oan ne’ebé ne’e normal iha família  uma laran, no sira hatene sei la lori ida ne’e ba públiku  tanba nasaun ida ne’e sira maka hari,” katak nia.

Tuir nia, durante sira sei iha ne’e buat ne’ebé ema hanoin ne’e sei la akontese no sei la fó  inpaktu ba iha eleisaun parlamentar ne’ebé maka mai ne’e. (ino)

Timor Post