Prezidenti Repúblika Apresia Governu Kriminaliza Rama Ambon

DILI (ANTIL) - Prezidenti Repúblika, Taur Matan Ruak, apresia ho governu nia desizaun liuhusi Konsellu Ministru ne´ebé aprova ona dekretu lei ida atu kriminaliza uzu no porte Rama Ambon no Armas Brankas.

“Prezidenti Repúblika apresia governu nia esforsu para depois hadi´a di´ak liu-tan ita nia situasaun seguransa iha futuru bele tranquil (aman) no aumezmu tempu eduka sidadaun sira nia komportamentu,” Ministru Interior, Longuinhos Monteiro hato´o informasaun ne´e ba jornalista sira iha Palásiu Prezidénsia Repúblika, Kuarta, hafoin inkontru ho Xefi Estadu Taur Matan Ruak.

Nia haktuir katak dekretu lei kriminaliza Rama Ambon refere governu sei haruka ba Parlamentu Nasionál atu deskuti nune´e bele aprova hodi implementa iha tempu hirak tuir mai.

Iha sorumutu ho Prezidenti Repúblika, Longuinhos informa, nia mós aprezenta estatístika ba dadus insidenti, kriminál no asidenti tráfiku ho nia impaktu sira ne´ebé mosu no governu iha planu atu hadi´a para diminui tendénsia ba kazu sira ne´ebé mosu iha rai laran.

Kona-ba situasaun tránzitu rodaviária, nia haktuir, asidenti hamutuk 1717 ne´ebé mosu iha tinan kotuk (2016) lori ninia rezultadu vítima mate hamutuk 71. Tanba ne´e, nia foti rezumu no konkluzaun katak insidenti sira ne´e mosu tanba falta disiplina hosi motorista sira.

“Diresaun Nasionál Rodaviária oras ne´e daudaun halo sosializasaun hela regulamentu balun para bele introdus liu-liu ba sira ne´ebé lori transporte para depois iha disiplina di´ak liu-tan iha estrada para evita problema,” Longuinhos haklaken.

Jornalista: Xisto Freitas / Editor: Gantry Meilana