terça-feira, 21 de fevereiro de 2017

Governu Harii ona Estrada Nasionál 860 Km

DÍLI, (ANTIL) - Governu Timor-Leste (TL) iha tinan rua ikus ne’e liuhusi Ministériu Obras Públikas no Telekomunikasaun (MOPTK) harii ona estrada nasionál hamutuk 860 Km, estrada munísipiu kilometru 53 no estrada urbana sira kilometru 80, nune’e mós ponte ualu no hala’o ona mós traballu enjeñaria nian sira ne’ebé signifikativu, atu bele evita inundasaun.

Informasaun ne’e fó sai husi Primeiro-Ministro, Rui Maria de Araújo ba media sira iha Palácio do Governo, Díli, Sesta (17/02) iha ámbitu aprezentasaun rezultadu serbisu sestu governu konstitusionál.

Xefe governu ne’e informa tan katak ne’e nu’udar kontinuasaun husi projetu eletrifikasaun nasionál husi V governu instala ona liña foun média tensaun nian hamutuk kilometru rihun ida resin no liña tensaun baixa nian hamutuk kilometru 1.321, ne’ebé fó ona benefísiu ba ema hamutuk 263 ba rede abastesimentu bee nian.

Planu mestre sira bee nian iha kapitál Manatuto no saneamentu ba Kapitál Baucau, Lospalos, Same no Vikeke nian remata ona.

Molok ne’e, Primeiru-ministru iha nia intervensaun dahuluk bainhira assume pasta nu’udar xefe governu afirma katak sustentabilidade no diversifikasaun ekonómika maka nesesidade urjente.

“Atu satisfaz ba nesesidade hirak ne’e husi setór ekonómiku nian, fó ona apoiu espesiál ba pilár lima ne’ebé identifika ona iha Guia ba Reforma Ekonómika no kresimentu Timor-Leste iha tinan 2015 to’o 2017 kona-ba setór sira mina-rai no gás, agrikultura, peska no indústria transforma,” hateten primeiru-ministru.

Nia reforsa, halo ona mós esforsu maka’as atu kria ambiente ida ne’ebé bele lori ba diversifikasaun ekonómika, ne’ebé taka dalan ba indústria, finansiamentu no komersiu.

Alokasaun orsamentu ba fundu infrastrutura iha ba MOPTK hamutuk $ 504.780.236,92 no husi orsamentu ne’e fó kontinuidade ba projetu infrastrutura bázika iha área enerjia elektrika, Estrada no ponte, bee no saneamentu, edifísiu públiku, finansa, edukasaun, seguransa no defeza nomós agrikultura.

Projetu hirak ne’e engloba munisípiu 12 no Rejiaun Espesiál Oe-cusse, Ambeno. (Jornalista:Rafy Belo/Editor : Alberto Alves)

Foto: Ilustrasaun

Sem comentários: