Horta: TL Nia Demokrasia Di’ak Liu Iha Asia

DILI (ANTIL) - Laureado Nobel da Pas José Ramos Horta apresia servisu governu Timor-Leste ne’ebé mak lideradu hosi Rui Maria de Araújo tanba hatudu indikador di’ak ba mundu internasionál liu-liu demokrasia.

“Revista Ekonimic Loudres, Inglatera halo avaliasaun ida hatete, Timor-Leste demokrasia di’ak liu iha asia tomak, nune’e mós saúde no edukasaun la’o di’ak, José Ramos Horta, informa ba jornalista iha Novu Turismu, Segunda (20/02).

Ramos Horta observa katak durante iha tinan rua nia laran governu ne’ebé mak lideradu hosi Primeiru Ministru Rui Maria de Araújo, maske hasoru difikuldade, maibé konsege halo esforsu makas hodi hatudu rezultadu di’ak iha prosesu dezenvolvimentu.

“Ha’u fó parabens ba Dr Rui Maria de Araújo bele kria ekilibriu iha governasaun ida ne’e,” Horta apresia.

Hodi fó hanoin katak, ba futuru (restu tinan ida) tenki halo esforsu makas liu tan iha setór saúde liu-liu kondisaun Óspital nasionál to’o referal sira, tanba ohin loron sei enfrenta hela difikuldade oin-oin.

Difikuldade hanesan ekipamentu óspital nian to’o iha profesional saúde sira hanesan mediku no parteira sira, presiza apoiu liu tan, liu hosi hela fatin, transporte no kondisaun seluk ne’ebé ligadu moris lor-loron nian.

Biar nune’e, Horta dehan bainhira haree ba buat ne’ebé agora dadaun governu halo kompara ba tinan 2002 sa’e mai leten hodi haree liu ba nasaun seluk nia kondisaun, Timor-Leste iha tinan 15 ba prosesu konstroi estadu dezenvolvidu tebes duke rai sira ne’e.

“Ha’u orgullu no ha’u kontenti ba buat ne’ebé ita halo ona,” Ramos salienta tan.

Antes ne’e iha komemorasaun aniversariu tinan daruak governu nian, PM Rui Maria de Araujo hatete katak iha restu mandatu ne’ebé mak iha governu ne’ebé nia lidera sei iha misaun inportante liu-liu oinsa atu garante elisaun no garante governasaun ho imparsial to’o hetan governu foun.(Jornalista: Manuel Pinto/Editor: Alberto Alves).