DÍLI,
(ANTIL) – Durante tinan rua governasaun Timor-Leste (TL) iha lideransa
Primeiru-ministru, Rui Maria de Araújo to’o agora hetan progresu iha área saúde
no edukasaun nian.
“Programa
saúde iha família, to’o oras ne’e, vizita hamutuk 149.000 resin halo ona ba uma
kain sira, família hamutuk 190.00 resin mak simu ona kuidadu saúde no ema
hamutuk 902.000 resin mak hetan ona asesu,” refere komunikadu imprensa husi
sestu governu konstitusionál ne’ebé ANTIL asesu, foin lalais ne’e.
Bazea
ba dadus ne’e, iha komunikadu ne’e realsa katak governu halo ona análize ida
ne’ebé loloos kona-ba situasaun saúde nian iha família sira nomós
identifikasaun no resposta ne’ebé efikaz ba risku sira, governu hetan dadauk
progresu ne’ebé signifikativu, atu bele atinji ninia vizaun “timoroan sira
saudável ba iha Timor-Leste ida saudável”.
Entre
konkista oioin iha área saúde nian, tinan rua ikus governasaun nian ne’e marka
ona ho melloria iha servisu médiku ospitalár emerjénsia nian iha ospitál
Baucau, Maliana, Suai, Díli, Maubise no Oe-cusse nian liuhusi konstrusaun
postu saúde nian hamutuk 57, reabilitasaun ba sentru saúde hamtuk 22 no
inagurasaun ne’ebé halo foin dadauk ne’e ba ospitál rejionál Eduardo Ximenes
iha Baucau no aprovasaun ba rejime kontrolu tábaku nian ne’ebé importante,
ne’ebé mak sei iha impaktu boot iha saúde jerasaun dadaun ne’e no jerasaun sira
aban-bainrua nian.
Iha
área edukasaun nian, harii ona eskola f foun 15 no reabilita ona eskola 518
ensinu báziku nian no eskola 30 ensinu sekundáriu nian. Kadeira no meza hamutuk
98.000 resin mak fahe ona ba nasaun laran tomak no livru testu nian nomós
materiál hanorin nian sira seluk besik milaun ida mak sosa no imprime ona, atu
servi nível ensinu oioin.
Introdusaun
kuríkulu foun ida iha siklu daruak iha ona faze ikus. Merenda escolar distribui
ona iha eskola 1.505 no fó benefísiu ba estudante hamutuk 300.000 resin.
Xefe
governu sestu governu konstitusionál hetan tomada de posse husi prezidente
repúblika, Taur Matan Ruak iha 16 Fevereiru 2015 hodi troka primeiru-Ministru
anterior, Kay Rala Xanana Gusmão.
Informasaun
kona-ba tomada de posse ne’e bele mós asesu iha link ne’e: https://www.mof.gov.tl/the-swearing-in-of-the-new-national-unity-government/?lang=tl
(Jornalista:Rafy Belo/Editor: Alberto Alves)
Foto:
Primeiru-Ministru, Rui Maria de Araújo durante sorumutuk ida ho jornalista sira
husi media imprensa no elektrónika hodi informa kona-ba rezultadu serbisu
durante dékada rua iha sestu governu konstitusionál. Foto: GPM
Sem comentários:
Enviar um comentário