NILTON GUSMÃO : MS LABELE TESTE GOTA HO INUS

Diretur Ezekutivo GOTA, Nilton Gusmão husu ba Ministeriu Saude (MS) atu la bele halo teste ba bee mineral sira ne’ebe produs iha timor ho inus.

“Parte MS wainhira ami hahu produs bee, ami komunika duni ho sira atu mai halo teste ba ami nia be, razaun lolos momentu ne’eba MS la iha ekipamentu, teste ne’e la’os halo deit ho inus atu horon tun horon sa’e, ne’e la’os teste propriu, no mos teste la’os uja matan tanba ne’e maka ami desmente total informasaun katak ami nia be GOTA kualidade ladiak,” hateten Diretur Ezekutivo GOTA, Nilton Gusmão liu husi komferensia ba imprensa iha armagem kompanhia GOTA, Fatuhada, Dili, Segunda (20/02/2017).

Nilton Gusmão rekonhese duni katak, sira la hodi sampel ba teste iha laboratorium Ministeriu Saude nian, tanba ministeriu laiha ekipamentus kompletu kompara ho laboratorium Serbisu Agua no Saneamentu (SAS) nian kompletu liu.

“Hau rekonhese katak, desde ami hahu produs be ne’e tinan tomak mos ami la hodi sampel, tanba ami hatene katak iha tinan 2013 kuandu ami bolu sira seidauk iha ekipamentus, iha ekipamentus balu, mais laiha buat barak, SAS mak ekipamentus kompletu iha laboratorium, ami tinan-tinan sempre ba halo teste, ami mos iha laboratorium rasik, ne’ebe ami halo teste loron-loron, para atu hatene ami nia produto nia kualidade hodi nune’e garante saude diak ba iha konsumedores,” dehan Nilton Gusmão.

Nain ba Kompanhia Esperansa Timor Oan (ETO) ne’e esklarese katak, kompanhia GOTA atu halo fabrika ba iha bee hemu priense hotu kriteria ne’ebe mak iha, tanba ne’e maka garante kualidade.

“Ami fabrika be GOTA ho orgulho hodi dehan katak, ami nia be iha kualidade no saudavel ba iha suciedade, medikus Timor oan 50 % konsume ami nia be, medikus especialitas iha Timor konsume ami nia be, no sira rasik mak vizita ami nia fatin,” dehan nia.

Nia akresenta katak, konsumedores be GOTA maioria sidadaun estranjeiros ne’ebe mak hala’o serbisu iha Timor.

Nilton husu ba Governu li-liu ministeriu kompetente katak, defini lolos parte ne’ebe mak bele halo teste ba iha sira nia be, tanba SAS no Ministeriu Saude iha hotu laboratorium.

“Ami prefere ba Governu halo estandard ida para atu define lolos se los mak bele halo teste, para ami ba los deit ida ne’ebe define ona, tanba laboratorium rua ne’e Governu nian hotu, los duni katak iha nia nasaun iha faze konstrusaun, ne’ebe sei iha difikuldades barak presija kontribuisaun husi parte hot-hotu, maibe tendensia atu hatun malu hodi oho industria iha rai laran, ne’e labele no industria iha rai laran labele buras no la fo empregu,” afirma Nilton.

Nilton dehan, fabrika be GOTA prontu atu simu desizaun saida deit husi Governu kuandu detekta buat ruma ladiak durante produsaun ba be GOTA.

“Ami prontu atu taka ami nia fabrika kuandu detekta buat ruma ladun diak, maibe ami afirma dala ida tan katak, ami nia be kualidade diak, ami halo teste tinan-tinan ba iha SAS. Ami nia odamatan nakloke ba instituisaun ne’ebe mak atu halo inspeksaun, maibe tenke inspeksaun ba iha industria hot-hotu, labele ami deit,” sublinha nia.

Entretantu fabrika be GOTA fo serbisu ba Timor oan hamutuk nain 32, trabalhadores ne’ebe mak serbisu iha fabrika ne’e mioria Timor oan, laiha ema estranjeiros, 1.500 to’o 2 kil por garafas loron ida, kuantidade ida ne’e sei konsidera kuantidade ida ne’ebe mak ki’ik teb-tebes, be GOTA barak liu distribui iha kapital Dili, iha Municipiu seidauk barak, foin maka municipiu Liquisa. mia

Jornal Nacional Diário