Reprezentante
povu iha Parlamentu Nasionál (PN), ejiji ba Prezidenti Repúblika (PR), Taur
Matan Ruak, atu troka Prezidenti Tribunal Rekursu (TR), Guilhermino da Silva,
tanba nia saúde la permite ona atu halo servisu.
Prezidenti
Komisaun A, ne’ebé trata asuntu leis no poder lokal, Carmelita Moniz hatete
katak, nia halo nia deklarasaun polítika kona ba ejersisiu kargu públiku.
“Ha’u
husu ho hakruk ba Prezidenti Repúbika ne’ebé mak iha kna’ar atu hili Prezidenti
Tribunal Rekursu, halo favor bo’ot ida haree liu ba sentimentu umana no
kondisaun, tanba ita haree Prezidenti Tribunal Rekursu realidade labele assume
ona kargu ne’e,” dehan Carmelita Moniz iha plenária PN, Segunda (20/02).
“Tuir
ita nian konstituisaun, lei no prátika internasionál tomak hatete katak,
ejersisiu kargu polítikus ejiji titulares tenki iha kondisaun saúde
perfeita no saúdavel, tanba kargu hirak ne’ebé mak sira ejerse, haree ba
intrese públiku ka nasaun nian, la’os haree ba intrese privadu ida-ida nian,”
dehan Carmelita.
Nia
hatutan, tuir ema hotu hatene, hot-hotu rekuñese katak, Prezidenti Tribunal
Rekursu, Guilhermino da Silva nia saúde ladi’ak atu ezerse funsaun ida ne’ebé
mak importante tebes nasaun ida ne’e, li-liu ezerse funsaun ida ne’ebé poder
aas liu iha rai ida ne’e nian.
“Ha’u
kuandu asiste iha televizaun, tuir ha’u nia sentimentu privada ba kestaun
umana, ita la tega atu haree. Ita obriga ema ida ho kondisaun ida hanesan ne’e,
ejerse nafatin nia funsaun, ho kna’ar ida ne’ebé todan tebes ba nia,” relata
Carmelita Moniz.
Nia
afirma, haree ba Guilhermino nia saúde, no bazeia ba auto estadu medíku husi
Hospital Nasionál Guido Valadares, kuandu halo analiza ida ne’ebé krítiku,
konselu foti desizaun liu husi rezolusaun ida katak, sei bele karik suspende
lai Prezidenti Tribunal Rekursu husi nia servisu ba fulan tolu hodi konsentra
de’it ba nia tratamentu saúde, bainhira rekoopera ona, mak fila fali ba nia
kargu.
Maibé
Prezidenti Tribunal Rekursu la hakruk ba desizaun ne’ebé mak Konsellu Superior
Magisratura Judisial foti, hodi hala’o nafatin nia kna’ar.
“Ha’u
haree iha semana pasadu, Prezidenti Tribunal Rekursu halo sorteiu da lista ba
kandidatu Prezidenti Repúblika, ita haree katak, nia kondisaun nafatin hanesan
ne’e, no parese aban (ohin) Prezidenti Tribunal Rekursu ne’e sei ba halo
tratamentu iha Bali,” relata Carmelita.
Nia
afirma, tratamentu ba Prezidenti Tribunal Rekursu ne’e, Ministériu Saúde mak
toma responsabilidade hodi trata buat hotu, inklui mós orsamentu ba nia
familia.
“Maibé
tuir informasaun ida ne’ebé mak ha’u hetan katak, Prezidenti Tribunal Rekursu
mós, husu nafatin osan adisionál husi Tribunal Rekursu, no Tribunal Rekursu
hasai tan osan adisionál ida hodi fó ba Prezidenti Tribunal Rekursu, ho nia
subrinha ida ne’ebé mak sei akompaña, alende selu husi Ministériiu Saúde, selu
mós husi Tribunal Rekursu,” lamenta Carmelita.
Nia
haktuir, alende familia mak akompaña Prezidenti Tribunal Rekursu hodi ba halo
tratamentu, iha mós eskoltu nain rua mak akompaña ho nia sekretaria, no
kondutor.
“Ida
ne’e mós ita haree katak, sei fó impaktu ba gastus husi orsamentu Tribunal
Rekursu nian. Ha’u hakarak husu de’it, se Ministériu Saúde mak fó ona gastus ba
nia perdiam ho nia familia nia perdiam no tratamentu saúde tomak, sera que
instituisaun seluk bele fó tan? Ida ne’e ita haree dupla, ba familia no ba
Prezidenti, no lori tan Sekretária, no lori tan ho kondutor, karik atu ba kaer
kareta iha ne’eba,” katak Carmelita.
Nia
esklarese, dalaruma Prezidenti Tribunal Rekursu halo kritika maka’as ba ema
seluk nia komentáriu iha jornal ka iha televizaun, maibé husu fali sira nia-an
rasik katak, sira mós halo tuir ona lei ka la’e.
Nia
dehan, aat liu tan Prezidenti Tribunal Rekursu fó ona nia komentáriu iha
ajensia Lusa kona ba kazu Emilia Pires ne’ebé mak agora dada’uk rekursu la’o
hela katak, Emilia Pires no Madalena Hanjam koruptu duni, no desizaun Tribunal
nian ne’e los.
Nune’e
mós, deputadu Antoninho Bianco husi bankada FRETILIN mós dehan, ko’alia kona ba
moras, ida ne’e responsabilidade Ministériu Saúde nian.
“Kestaun
orgaun soberanu iha direitu ka laiha direitu kuandu moras ne’e, ha’u hanoin ita
husu ba sira ne’e (Governu) atu bele hatan, halo nusa mak los. Mas moras atu
halo servisu ba orgaun soberanu ne’e, ita tenki preokupa,” katak nia.
Alende
ne’e, Xefi bankada CNRT, Natalino dos Santos mós husu ba Governu atu tau matan
ba asuntu ida ne’e.
“Se
Prezidenti Tribunal Rekursu ne’ebé lidera orgaun soberanu ida mak ho kondisaun
hanesan ne’e, Timor ona jurista sira ne’ebé mak servisu iha Tribunal ne’eba
ne’e, laiha tiha ona ka,”kestiona Natalino.
Nia
hatutan, situasaun ida ne’e hatudu imajen ladi’ak ba públiku, bainhira kuandu
sai iha televizaun. Natalino mós husu atu halo investigasaun ba kustus
tratamentu Prezidenti Tribunal Rekursu nian ba rai liur.cos
Jornal
Nacional Diário
Sem comentários:
Enviar um comentário