terça-feira, 7 de fevereiro de 2017

Orsamentu Porvolta $10 Milloens Sei Aloka ba Eleisaun Jerál

PARTILHAR
DILI, (ANTIL) – Ministru Estadu Koordenadór Assuntus Administrasaun Estadu no Justisa no Ministru Administrasaun Estatál, Dionísio Babo informa, governu sei aloka orsamentu porvolta $10 milloens ba atividade eleisaun jerál.

“Orsamentu porvolta $10 milloens sei tenta atu preve no halo poupa, sei iha eleisaun prezidensiál mak primeiru ronda de’it, ita poupa lubuk ida mas kuandu ita tenke liu segundu volta, ita tenke gasta osan barak, governu tenta poupa atu bele rai osan”, Dionísio ba jornalista sira iha Palásiu Governu, Tersa, (7/2).

Nia hatutan, konsellu ministru hasai ona desizaun ida katak atu halo impresaun buletin sira uza gráfika governu nian, ida ne’e hanesan poupansa ida, sira ne’ebé gráfika labele halo mak governu buka fali outsourcing ida ba kompañia sira bele halo.

Tuir nia, eleisaun rua mas bele halo dala tolu, orsamentu preve iha kuotasaun governu, la’ós Ministériu Estatál ou STAE mak ka’er maibé kuotasaun governu katak Primeiru Ministru mak tenke aprova mak foin bele ezekuta.

Governante ne’e hatutan tan, ohin Vise Ministru Estatál ba defende alterasaun lei eleisaun iha Parlamentu Nasionál (PN), bele halo ajustamentu atu haree ba orsamentu.

Kalendáriu offisiál hosi governu eleisaun prezidensiál sei realiza iha 20 Marsu tinan ida ne’e, 18 Fevereiru Tribunál Rekursu fó hatene ba STAE no ba Komisaun Nasionál Eleisaun, kandidatura hirak ne’ebé admiti ona, STAE fó sai númeru no fatin sentru sira votasaun nian no estasaun sira votu nian, hafoin 19 to’o 21 Fevereiru STAE fó sai kandidatura sira ba públiku, no 3 to’o 17 Marsu períodu kampaña eleitorál nian. (jornalista: Julia Chatarina; editora: Rita Almeida)

Foto: Dadaun ne'e STAE halo hela verifikasaun ba dadus apoiante ne'ebé kandidatu sira aprejenta hodi kompete ba eleisaun prezidensiál periodu 2017 to'o 2022. Foto STAE
PARTILHAR

Author: verified_user

Publicação luso-timorense sem fins lucrativos

0 comentários: