PM Rui Halakan Toxa ba Pás

DILI, (ANTIL) – Primeiru Ministru, Rui Maria de Araújo halakan toxa ba paz Sri Chinmoy iha Parlamentu Nasionál (PN), ohin, (7/2).

Oportunidade ne’e, Xefi Governu husu ba Sekretáriu Estadu Juventude no Desportu (SEJD) Leovigildo Hornay atu iha tinan ida ne’e haruka mós juventude Timor-Leste nain rua hodi halo vizita hamutuk ho ekipa Sri Chinmoy Oneness-Home Peace Run ne’ebé kompostu hosi nasaun sira iha mundu rai klaran ne’ebé iha interese ba programa ne’e.

“Hili karik labele haree ema sira ne’ebé mutu rabu”, PM hameno iha nia intervensaun.

Sermonia ne’e hetan partisipasaun hosi Prezidenti PN Aderito Hugo, Ministru Negósiu Estranjeiru Hernani Coelho, Sekretáriu Estadu Juventude Desportu inklui deputadu PN ho reprejentante kandidatu Prezidenti José Luis Guterres ho Antonio Lopes Maher no ekipa Sri Chinmoy Oneness-Home Peace Run.

Iha fatin hanesan, Prezidenti PN, Aderito Hugo dehan, pás unika liña verdaderiu ba progresu úmanu.

Entertantu reprejentante Sri Chinmoy Oneness-Home Peace Run, Mr Salil apresia tebes ba Timor-Leste nia vontade hodi simu sira iha pais Repúblika Demokratiku Timor-Leste.

Nia dehan, bainhira vizita iha Timor hetan reasaun posetivu tebes hosi lider nasionál no lider orgaun soberañu, nune’e Timor marka istória diferente tebes ba ekipa Sri Chinmoy Oneness-Home Peace Run ho nasaun sira seluk ne’ebé ekipa refere halo vizita ba.

Hafoin halakan Toxa hosi Primeiru Ministru, Ekipa Sri Chinmoy Oneness-Home Peace Run intrega medalla ba PM ho Prezidenti PN perante estudante sira nian oin ne’ebé partisipa mós seremonia ne’e.

Iha taka ho marsa hamutuk hosi PM ho Prezidenti PN, deputadu no estudante no ekipa Sri Chinmoy Oneness-Home Peace Run.

Chinmoy Kumar Ghose, kuñesidu ho naran Sri Chinmoy nu’udar master ispirituál Indiano ne’ebé konsege hanorin meditasaun iha nasaun Óeste no iha tinan 1964 nia muda ba iha Nova Yorke hodi hari sentru meditasaun no to’o agora iha membru serkula iha nasaun hamutuk 60 iha mundu rai klaran.

Timor-Leste rasik iha Parlamentu Nasionál nia oin harii mós estatua Chinmoy Kumar Ghose, iha 2013. (jornalista: Manuel Pinto; editora: Rita Almeida)

Foto: Primeiru Ministru, Rui Maria de Araujo halakan Toxa ba P Toxa ba Pás iha Parlamentu Nasionál, Tersa, (7/2). Foto ANTIL/Manuel Pinto