segunda-feira, 6 de fevereiro de 2017

F-FDTL INFRENTA OBSTÁKULU BO’OT 3

PARTILHAR
Instituisaun FALINTIL Forsa Defeza Timor Leste (F-FDTL) durante tinan 14 nia laran ne’e, infrenta obstaklu bo’ot tolu mak hanesan, akontesimentu Lospalos entre F-FDTL ho PNTL, krize 2006 no disputa Governu ho Prezidenti Repúblika kona ba nomeasaun Xefi Estadu Maior F-FDTL nian.

Eis Sekretáriu Estadu Defeza, Julio Tomas Pinto (JTP) informa katak, Depois transforma tiha mai FALINTIL-FDTL,  militar infrenta obstaklu barak. Obstaklu sira ne’ebé mak sa’e mai, obstaklu interna forsa armadas nian.

JTP fó ezemplu katak,  iha tempu ne’eba fasilidade ladun iha, saláriu ki’ik, uniforme ne’e ketak-ketak, balu simu husi China, balu husi America no balu Estadu  suku rasik, no armamentu iha momentu ne’eba, F-FDTL hetan apoiu husi Estados Unidos America, ho kilat sira ne’ebé mak segundu mão.

“Obstaklu ne’ebé ita nia forsa armada hetan ne’e barak, maibé iha tolu mak importante, ida mak akontesementu Lospalos, depois obstaklu segundu mak ita hetan iha krize 2006, krize mosu iha ita nia rai, implika mós populasaun, obstaklu terseiru mak, disputa entre Governu ho Prezidenti Repúblika nu’udar komandante supremu ba nomeasaun Xefi Estadu Maior Jeneral,” relata Julio Tomas Pinto ba jornalista sira iha MNEK Dili, Kinta (02/02).

Julio Tomas Pinto hatutan, nu’udar ema ne’ebé mak uluk servisu iha Sekretáriu Estadu Defeza, senti obstaklu tolu ne’e mak bo’ot liu.

Nia afirma, obstaklu primeiru ba kazu Lospalos ne’e, Governu resolve liu husi hari’i ekipa ida ba halo investigasaun ba kazu Lospalos entre polisia ho F-FDTL. Nune’e JTP dehan, rezultadu husi investigasaun ne’e, balu implementa ona, no balu seida’uk implementa.

Nia relata, kazu 2006 ne’e, Estadu foti desizaun resolve problema ne’e, Xanana Gusmão ho membru Governu sira tenta resolve, mesmu implika populasaun barak mak lakon sira nia sasan, no Timor oan barak mak mate.


Nia esplika, foin dada’uk disputa Governu ho Prezidenti Repúblika ne’e, tanba interpretasaun konstitusionál.

“Ne’e ita tenki resolve lalais, tanba ita labele preve ka husik ida ne’e akontese tan iha futuru,”katak Julio Tomas Pinto.

Alen de ne’e, Julio Tomas Pinto mós dehan, loron 2 fulan Fevereiru 2001, loron istóriku ida, tanba iha momentu ne’e, lider Timor oan sira hamutuk ho reprezentante ONU, foti desizaun ida hodi transforma guerilia ida ba iha forsa profesionál.

 “Ita agora dada’uk muda forsa nia naran ne’e, dala ida rua ona. Fevereiru 2001, ita transforma husi FALINTIL mai F-FDTL, depois iha 20 de Maio kuandu ita restaura ita nia independensia, ita transforma tan nia naran ba iha FALINTIL FDTL,” informa Julio Tomas Pinto.

Nia hatutan, ida ne’e hatudu ba mundu katak, Timor oan bele defende nia soberania rasik, liu husi aprosimasaun militar, no estabelesimentu inistituisaun militar.cos

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: