terça-feira, 7 de fevereiro de 2017

STAE Sei Hetan Apoiu Urna no Kabina Votu Hosi Liur

PARTILHAR
DILI, (ANTIL) – Sekretaria Tékniku Administrasaun Eleitorál (STAE) sei hetan apoiu materiál hanesan urna no kabina votu ba prosesu eleisaun prezidensiál tinan ne’e hosi orgaun eleitorál Austrália no Portugál.

“Timor-Leste iha materiál sira eleisaun, la’ós laiha mak ita husu sira atu fasilita ita, maibé ida ne’e opsaun ida tanba ita atu lori materiál sira hosi Timor-Leste ba estranjeiru mós bele han kustu barak”, dehan Diretór Jerál STAE, Acilino Manuel Branco ba ANTIL iha nia servisu fatin, Kaikoli, Tersa (7/2).

Nia haktuir, Ministériu Negósiu Estranjeiru no Kooperasaun (MNEK) hatun ona ordem ba konsuladu sira atu halo kontaktu ho orgaun eleitorál iha nasaun rua ne’e nia posibilidade hodi fasilita materiál urna no kabina votu, maibé materiál sensitivu sira ita mak lori hosi TL ba estranjeiru.

Hodi hatutan, informasaun verbál ne’ebé hetan ona hosi reprezentante konsul jerál TL iha Darwin katak sira halo ona kontaktu ho Orgaun Eleitorál Darwin inklui Portugál no sira iha interese boot tebes atu fó apoiu ba prosesu eleisaun liuhosi apoiu urna, kabina votu, fó formasaun no fó espasu ruma atu ba votasaun bainhira konsuladu TL nia fatin la-permite ba votante sira.

Maske nune’e, hosi MNEK mós seidauk hato’o rezultadu koordenasaun ho eskrita atu hato’o ba konsellu ministru liuhosi desizaun polítiku hodi konkorda ou la’e.

“Utilizasaun materiál eleisaun tenke haree tanba atu lori materiál sira mai Timor-Leste bele ka la’e, ne’ebé ita sei tetu hela ida ne’e, bele ka la’e ita uza no dalaruma mós labele”, nia esplika.

Entretantu, relatóriu MNEK tenke hato’o ona ba konsellu ministru atu bele foti desizaun ruma, karik konkorda ou la’e, bainhira uza fasilidade ema nian, konkorda ita utiliza no la’e ita labele. Eleisaun prezidensiál sei akontese iha 20 Marsu 2017. (jornalista: Zezito Silva; editora: Rita Almeida)
PARTILHAR

Author: verified_user

Publicação luso-timorense sem fins lucrativos

0 comentários: