Dionísio: Xanana Apóiu Lu-Olo Hanesan Opiniaun Pessoál

DILI, (ANTIL) – Sekretariu Jerál Partidu Congreso Nacional Rekonstrusaun Timor (CNRT) Dionísio Babo esklarese, steitmentu apoiu ba kandidatu prezidenti, Francisco Guterres Lu-Olo hosi prezidente partidu CNRT Xanana Gusmão nu’udar opiniaun pessoál.

“Nia (Xanana-red) fó opiniaun pessoál, ami tenke hein kongressu mak foin deside tanba ne’e mak pozisaun agora sei tuir nafatin saida mak prezidente CNRT hatete”, Babo ba jornalista sira iha Palásiu Governu hafoin reuniaun Konsellu Ministru, Tersa (7/2).

Deonísio Babo informa, planu kongressu sei akontese fulan oin, sei la-realiza mak muda fali ba fulan seluk, depende situasaun dezenvolvimentu eleisoens jerais ne’ebé sei hala’o.

Nune’e nia dehan tan, atu kompete eleisaun lei la-termina katak tenke hala’o kongressu bainhira mas depende liu ba kondisoens interna partidu, normalmente halo antes eleisaun para depois bele define polítika ho estratejia partidu ida. “Ida ne’e mak akontesse iha partidu CNRT”, katak tan.

Atuál Ministru Estadu Koordenadór Assuntus Administrasaun Estadu no Justisa no Ministru  Administrasaun Estatal ne’e realsa, kona-ba apóiu Lu-Olo sai prezidente sei iha diskusaun interna partidu CNRT, tenke haree mós ba estabilidade país ne’e tinan lima mai.

“Interesse nasionál a’as buat hotu, tanba ne’e atu foti dezisaun liu-liu kona-ba lideransa país nia, kona-ba oinsá mak atu implementa ita nia polítika ba futuru ne’e ita tenke tau interesse nasionál iha leten”, Deonísio dehan tan.

Nia hatutan, kestaun pessoál ne’e kestaun ketak ida, ba partidu CNRT ka’er nafatin prinsípiu, tenke haree didiak desizaun ida sala, depois tinan lima ne’e ita hili fali ema ida ne’ebé la-koñese situasaun estadu nia ba futuru, liu-liu Timor-Leste nasaun foun ida, ne’e duni tenke kuidadu.

Prezidente CNRT Xanana Gusmão fó apoiu ba prezidente partidu Frente Revolusionáriu Timor-Leste Independente (Fretilin), Francisco Guterres Lu-Olo ba Prezidente da Repúblika periodu 2017 to’o 2022.

“Hanesan pessoál ha’u fó apoiu ba señor dotor Lu-Olo,” Xanana Gusmão hato’o lia hirak ne’e iha Aeroportu Internasionál Nicolau Lobato, Komoro, Dili, Segunda (23/01/2017).

Xanana dehan hanesan partidu polítiku ida, sei hein desizaun másimu iha kongresu partidu CNRT nu’udar desizaun mais alta ne’ebé sei akontese iha fulan oin. (jornalista: Julia Chatarina; editora: Rita Almeida)

Foto: Sekretariu Jerál Partidu Congreso Nacional Rekonstrusaun Timor (CNRT), Dionísio Babo. Foto Espesiál