Prezidente Tribunal Rekursu timoroan nian rejeita akuzasaun sira iregularidade nian

Prezidente Tribunal Rekursu timoroan nian rejeita iha loron-segunda ne'e akuzasaun sira kona-ba iregularidade, ne'ebé aponta iha karta aberta ida hosi ministru Planeamentu no Investimentu Estratéjiku, Xanana Gusmão, hodi konsidera hanesan "falsu" katak hetan osan la tuir dalan regular.

"Ha'u seidauk haree karta. Ha'u la haree, maibé hanesan la loos katak halo duni asaun ne'e", afirma hosi Guilhermino da Silva, liuhosi deklarasaun sira ne'ebé nia halo ba Lusa iha nia gabinete iha Tribunal Rekursu iha Díli.

"Ne'e hanesan la loos. Ha'u la hatene kona-ba asuntu ne'e no hanesan ba dala uluk maka ha'u rona", nia hatutan mós, hodi husu kona-ba deskonfia iregularidade ne'ebé duun ba nia.

Akuzasaun sira iregularidade nian halo hosi Xanana Gusmão iha karta aberta naruk ida ne'ebé diriji ba eis-ministra Finansa, Emília Pires, hafoin eis-ministra hetan kondenasaun ba kadeia tinan hitu tanba partisipasaun ekonómiku iha negósiu.

Iha karta, ne'ebé maka Lusa hetan asesu, Xanana Gusmão halo krítika maka'as ba sistema judisial timoroan nian no halo akuzasaun sira kona-ba deskonfia kazu sira hosi abuzu ba fundu públiku sira maibé la aprezenta informasaun loloos ne'ebé bele komprova.

Iha konkretu maka akuza ba iregularidade finanseiru hosi Prezidente Tribunal Rekursu no mós Prokurador-Jeral Repúblika nian.

"Ema barak hatene katak Prezidente Tribunal Rekursu rasik simu ona osan hosi kompañia ida, ne'ebé iha projetu ida iha Tribunal, no ne'ebé seidauk hotu tanba falta osan, tanba folin di'ak ida fó ona ba Prezidente Tribunal Rekursu ne'ebé presiza. Ministériu Públiku de'it maka la hatene", Xanana hakerek.

"No iha tan: Prezidente ne'e fó projetu ida seluk ba nia irmaun, rekuza rezultadu hosi konkursu ne'ebé nia funsionáriu sira aprezenta ho kompañia ida seluk ne'ebé manán", nia hatutan mós.

Xanana Gusmão hatete katak justisa la atua iha kazu ne'e no kazu sira seluk "tanba tauk vingansa" no akuza mós iregularidade ba prokurador-jeral Repúblika nian, José Ximenes, hodi hatete katak nia karik uza ba benefísiu rasik osan ne'ebé nia aprezenta ona hanesan gastu ofisial sira durante nia partisipasaun iha enkontru ida CPLP nian iha Brazil.

Xanana Gusmão hakerek katak Prokurador-Jeral karik aprezenta relatóriu ida despeza sira nian, inklui jantar ida lahó faktura no ho de'it deklarasaun ida ne'ebé asinadu, afirma iha Díli "katak osan ne'e gasta iha jantar ida ba delegasaun CPLP nian" bainhira "labele iha duni resibu sira, tanba osan ne'e gasta tiha ona hodi sosa vestidu sira no buat sira seluk ba nia feen".

Insisti hosi ajénsia Lusa iha loron hirak ikus ne'e hodi komenta konteúdu karta nian, prokurador-jeral lakohi halo komentáriu ruma hodi hatete de'it katak rekupera hela hosi konstipasaun ida.

Bainhira hatán pergunta hosi Lusa kona-ba akuzasaun sira kona-ba abuzu poder hosi ajente judisial sira, halo iha karta hanesan, Guilhermino Silva rejeita mós avaliasaun ne'e.

"Ema sira hamosu daudaun konfuzaun maibé la'ós hanesan avaliasaun loloos ida hosi área justisa nian. Laiha abuzu poder ida. Ema ne'ebé hatete tenki hatudu prova, indika sé maka halo asaun ne'e", afirma hosi prezidente Tribunal Rekursu nian.

Responsável hosi área aas rekursu iha nasaun konsidera ona katak "problema hosi lian" portugeza hanesan dezafiu boot ida ne'ebé área judisial hasoru hodi konsidera katak "iha jeral laiha problema boot sira seluk".

"Buat hotu la'o daudaun ho di'ak, julgamentu sira halo hela iha tribunal distrital sira no iha ne'e mós avansa hela", nia hatete.

SAPO TL ho Lusa - Foto@ António Amaral /EPA