IHA IREGULARIDADE, TR HARUKA FILA DOKUMENTUS KANDIDATU PR NAIN 3

Sekretariadu Tékniku Administrasaun Eleitoral (STAE), haruka ona rezultadu verifikasaun dadus kandidatu Prezidente Repúblika nain 5 ba Tribunal Rekursu (TR). Maibe husi kandidatu PR nain 5 ne’e, kandidatu nain 3 mak TR haruka fila fali sira nian dokumentus ba STAE tanba iha iregularidade.

Diretor Jeral Sekretariadu Tékniku Administrasaun Eleitoral (STAE), Acilino Branco, informa,  kandidatu nain tolu ne’ebé mak TR haruka fila lista apoiantes mak kandidatu, Maria Ângela Freitas Silva, Amorin Vieira no Antonio Lopes Maher.

“Verifikasaun dadus  ne’e kontinua la’o hela. Ita hahú kedas iha loron 23 fulan Janeiru tinan 2017,  kuandu iha momentu ne’eba primeira lista kandidatura tama, no lista kandidatura tama ikus iha loron 5 fulan Fevereiru, por volta de 7 horas kalan. To’o agora ita iha kandidatu ema nain 8, agora  husi kandidatu nain lima ne’ebé ita verifika  desde dia 23 mai to’o agora, iha lima mak  ita fo tiha ona nia rezultadu ba TR. Kandidatu nain lima  mak ita fo tiha ona ba  tribunal, no tribunal komunika tiha rezultadu ne’e ba iha kandidatu ka reprezentante kandidatura. Husi kandidatu nain lima ne’e  nain 3  mak TR haruka fila fali sira nian lista apoiantes ba iha segunda ves. Signifika iha rezultadu verifikasaun ne’ebé  STAE  halo ne’e identifika iregularidade balun, mas ne’e so TR mak iha kompetensia atu fo sai,”dehan Diretor Jeral STAE ne’e ba jornalista sira iha nia servisu fatin Caicoli-Dili, Segunda (6/2/2017).

Acilino haktuir, kompetensia STAE mak halo verifikasaun no Tribunal Rekursu mak sei desidi karik verifikasaun lista apoiantes kompletu mak TR sei la haruka fila. No bainhira tuir TR  seidauk  los ka iha iregularidade balun mak TR sei haruka fila, hanesan dadauk iha kandidatu nain tolu mak konsege haruka fila tanba tuir komunikasaun ne’ebé TR halo relasiona ho lista apoiantes  mosu iregularidade.

Husi kandidatu tolu ne’ebé mak TR haruka fila-fali nia dokumentus refere iha kandidatu nain ida (1 ) mak STAE konsege  haruka fila nia lista apoiantes ba TR no nain rua seluk desde inisiu haruka fila lista apoiantes to’o agora seidauk iha informasaun ruma husi kandidatu refere.

“Ita simu fila fali, tan pela segunda ves kandidatu nain tolu ne’ebé mak ita haruka tiha ona nia rezultadu ba TR, no kandidatu nain rua seluk seidauk. Agora  kandidatu tolu seluk horiseik (Horibainrua-red) nain rua  foin tama ikus ne’ebé mak foin halo verifikasaun no ida ne’ebé  mak ita simu tiha ona ne’e verifikasaun hotu tiha ona, parese ohin (Horiseik-red) ita haruka nia rezultadu ba TR ne’ebé  ha’u hanoin ita halo esforsu extra ida para ita bele hato’o ba tribunal,”hatete Diretor STAE ne’e.

Desde inisiu kalendariu aprezentasaun kandidatura loke to’o agora iha kandidatu nain 8 mak rejista hanesan, José A.D. Neves, Amorin Vieira, Antonio Lopes Maher, Maria A.F. Silva, Antonio da Conceição, Francisco Guterres ‘Lu-Olo’, José Luis Guterres no José A . Tilman.

Semana oin TR anunsiu rezultadu

Husi sorin seluk, Prezidenti Tribunal Rekursu, Guilhermino da Silva, informa katak, kandidatu PR ba periodu tinan 2017-2022, hamutuk nain walu (8), mak rejistu ona, maibé iha 16 Fevereiru (semana oin), mak Tribunal Rekursu sei fó sai rezultadu ikus kona ba kandidatura sira nian.

Kandidatu nain ualu (8), maka hanesan, Francisco Guteres Lu-Olo (FRETILIN), Jose Luis Guterres, Jose Neves Sama La Rua, Angela Freitas, António da Conceição, António Maher Lopes, Amorin Vieira, no  Luis Tilman Soares.

“Agora dadauk sira nia dokumentus iha faze verifikasaun husi STAE, karik dokumentus kompletu no lós hotu ona, entaun lós ona. Sé balun seidauk lós ka la kompletu haruka sira kompleta tan. Depois ida ne’e STAE sei haruka fali mai iha Tribunal Rekursu hodi deklara ka anunsia entre kandidatura sira ne’e, se mak admite no la admite iha loron 16/02 no iha loron ne’e kedas hodi dada rifa ba númeru kandidatura atu tau iha númeru buletin votus ninian,” informa Prezidenti Tribunal Rekursu, Guilhermino da Silva ba JN-Diário iha nia serbisu fatin, Caicoli, Díli, Segunda (06/02).

Wainhira husu konaba, Tuir informasaun ne’ebe iha dehan dokumentus kandidatura Ângela Freitas nian TR fó fila fali ne’e la ka lós, Prezidenti TR ne’e hatete ida ne’e la los, los ne’e maka tribunal haruka sira atu kompleta tan dokumentus balun ne’ebé seidauk kompleta.ola/des

Jornal nacional Diário