segunda-feira, 6 de fevereiro de 2017

Eskola ne'ebé mosu hosi jezuíta nia mehi iha Timor-Leste iha tinan 46 liubá inaugura ona iha Díli

PARTILHAR
Aumentu hosi Escola Amigos de Jesus, projetu moris ida hosi padre jezuíta ida ne'ebé hela iha tinan durante tinan 46 nia laran iha Timor-Leste no ne'ebé hanorin lian portugés iha klandestinu, inaugura ona iha projetu ida ne'ebé hetan apoiu públiku no privadu iha loron-sábadu liubá, 04 Fevereiru.

"Hanesan mehi ida ne'ebé konkretiza ona", padre portugés João Felgueiras, ne'ebé simu kondekorasaun iha 2002 ho Grande Oficial da Ordem da Liberdade, hosi Prezidente portugés iha tempu ne'ebá, Jorge Sampaio, tanba rekoñese nia luta ba prezervasaun lian portugeza iha Timor-Leste, hatete ba Lusa.

Eskola foun, inaugura iha bairu Taibessi hosi Prezidente Repúblika timoroan, Taur Matan Ruak, hosi primeiru-ministru Rui Maria de Araújo no hosi ministru Edukasaun António da Conceição, hanesan kompleksu ida ho andar rua ho sala aula hamutuk 18 no sala espesializadu oioin, entre sira maka sala laboratóriu sira, sala múzika no arkivu sira, iha mós kapela ida.

Ho ensinu uza lian portugés tomak no jere hosi Komunidade Amigos de Jesus - organizasaun sivil ne'ebé lidera hosi João Felgueiras no hosi padre jezuíta portugés seluk ne'ebé hela iha Timor iha dékada barak nia laran, José Martins - eskola sei iha profesór na'in 60 no alunu sira entre siklu dahuluk to'o siklu datoluk.

Bainhira ko'alia ho Lusa, João Felgueiras hanoin hikas istória projetu nian, ne'ebé "moris hosi atividade pastoral hosi padre jezuíta sira nian" durante okupasaun indonéziu.

"Hahú ho fatin ida ne'ebé maka labarik sira hasoru malu, halibur malu no sai hanesan fatin edukasaun nian, formasaun nian. Nune'e maka moris hakarak ida hodi harii eskola ida", nia explika.


"Ami hahú ho apoiu ba alunu balun hosi ba estuda no hafoin ne'e hahú aumenta. Ema indonéziu sira haree ne'e hanesan asaun ida igreja nian no sira husik ami serbisu. Ami, nune'e, aproveita hodi hanesan kona-ba saida maka sai hanesan nasaun no sai nu'udar povu", nia hanoin hikas.

Iha inaugurasaun, xefe Governu, Rui Araújo, hanoin hikas knaar hosi ema ne'ebé sai ona hanesan "kapelaun" boot ida ba serbisu hosi afirmasaun ba identidade povu no nasaun timoroan nian" ne'ebé maka fó "nia dedikasaun no empeñu tomak".

"Eskola ne'ebé ohin loron ita inaugura instalasaun foun sira, hanesan legadu hosi vontade maka'as no persistente hosi asaun edukativu padre Felgueiras nian, hatudu hahú hosi semináriu Nossa Senhora de Fátima iha Dare, liuhosi Externatu São José ne'ebé ha'u iha sorte tebes hodi sai nu'udar alunu hosi ilustre jezuíta na'in rua ne'e, no to'o iha pontu importante, iha 1997, iha "embriaun" ida hosi Eskola Amigos de Jesus, ne'ebé ema timoroan barak dezenvolve ona nia eskolaridade no nia kapasidade matenek sira", nia fó hanoin.

"Hein atu projetu edukativu sira hanesan ne'e ho exelénsia la transforma ba kastelu exkluzivu sira ne'ebé inútil ba balun, maibé sai hanesan "fatin di'ak ida iha rai-maran" hosi problema edukativu sira ne'ebé maka nasaun hasoru, no sai hanesan banati ba edukasaun iha ita nia nasaun, edukasaun ida ne'ebé forma no prepara mane no feto timoroan sira ba futuru ne'ebé dedika ba serbisu Povu no Nasaun nian, hodi halo tuir padre Felgueiras nia ezemplu", nia hatete.

Iha Maiu 1999, reportajen hosi ajénsia Lusa rejista ona fonte hosi eskola ne'ebé inaugura iha loron-sábadu, uma ida ho ai-hun balun ne'ebé maka timoroan atus resin aprezende portugés, dalan hodi aprende subar.

Iha tempu ne'ebá, padre Felgueiras fó hanoin katak iha períudu sira ne'ebé ko'alia portugés iha Timor-Leste reprezenta kuaze kondenasaun lalais ida: "Iha tinan dahuluk sira iha timoroan barak maka hetan perseguisaun no tratamentu aat tanba iha livru sira iha lian portugés. Iha balun ne'ebé mate tanba de'it uza lian portugés", nia hatete iha tempu ne'ebá.

Hafoin independénsia, João Felgueiras nia mehi hetan dimensaun boot no eskola dahuluk ida, ho de'it sala aula neen - selu ho apoiu hosi Institutu Camões - loke iha tinan 2008, hatudu kedas katak hanesan fatin ida ne'ebé ema buka tebes.

Projetu hosi eskola formal liu, hanoin iha Komunidade Amigos de Jesus no inaugura iha loron-sábadu, aprova iha tinan 2012, hodi hanoin ba rai ida ne'ebé jezuíta sira sosa iha rezidente timoroan ida iha Díli, iha eskola dahuluk nia sorin.

Padre Felgueiras husu ajuda ba Governu no iha tempu ne'ebá primeiru-ministru Xanana Gusmão aprova orsamentu ida ho folin dolar millaun 1,7, liuhosi unidade apoiu ba sosiedade sivil hosi nia gabinete, ba konstrusaun no projetu sira.

Folin ida ne'ebé la to'o ba edifísiu ho andar rua ne'ebé hafoin ne'e hetan apoiu hosi empreza oioin no ema oioin ne'ebé halibur hamutuk hodi hakotu projetu, hodi sosa ekipamentu no selu buat ne'ebé falta iha projetu.

Esforsu sira ne'ebé halibur mós empreza oioin iha Portugal no Timor-Leste ne'ebé permiti harii saida maka sai hanesan ekipamentu edukativu sira ne'ebé di'ak ida ba nasaun no hodi konkretiza mehi hosi mane ida ne'ebé dedika ona nia moris ba Timor-Leste.

SAPO TL ho Lusa - Fotos: Gabinete do Primeiro-Ministro de Timor-Leste
PARTILHAR

Author: verified_user

Publicação luso-timorense sem fins lucrativos

0 comentários: