FUNDU MINA RAI TUN HUSI BILIAUN U$ 16.60 BA $15.84, TL SERVISU MAKA’AS ATU HASA’E FALI

Diretor Ezekutivu Jestaun Fundu Petroleu BCTL, Venáncio Alves Maria informa katak, osan fundu minarai Timor-Leste (TL) ne’ebé trimestre antes ne’e iha billiaun $ 16.60 no mai fali iha trimestre ikus ne’e (Outubru-Dezembru 2016) tun fali ba $ billiaun 15.84.

Tanba dehan Venancio, iha tinan 2016 transfere tiha $1.24 billiaun ba iha Orsamentu Jeral Estadu (OJE) 2017.

“Relatóriu ne’e hatudu katak kapital fundu minarai iha trismestre ikus ne’e maka billiaun $ 15.84 kompara ho billiaun $16.60 iha fim trimestre dahuluk. Osan ne’e tun, tanba transfere ba Orsamentu Jeral Estadu $1.24 billiaun. Negativu tanba ita transfere osan valór ne’e iha tinan 2016 nia laran, tanba ne’e maka rezulta osan ne’e tun,” dehan Venáncio Alves Maria ba jornalista sira liu husi konferénsia imprensa, iha nia serbisu fatin, Akait, Díli Kuarta (01/02).

Tuir Venáncio Alves Maria katak, maski osan tun ne’e la’os novidade foun, ba públiku tomak, tanba informasaun ne’e bai-bain ona sai iha públiku.

Maibé Diretur Ezekutivu Jestaun Fundu Petroleu BCTL ne’e afirma katak, atu hasa’e fila fali osan iha fundu petróleu ninia ne’e, TL tenki serbisu maka’as liu tan.

Venáncio Alves hatutan katak, relatóriu ne’e mós hatudu katak, total reseitas maka simu iha trimestre ne’e hamutuk milliaun $36.21 ne’ebé mai husi mina Timor, kompostu husi kontribuisaun sira ba fundu hamutuk milliaun $10.14 no pagamentu Royalty simu husi Autoridade Nasional Petróleu millaun $ 26.07.

Venáncio dehan tan, lei fundu minarai nian espesifika katak jestor operasional BCTL maka hanesan ajente responsável ba jestaun fundu minarai ninian no Ministériu Finanças maka responsável atu estabelese estratejia investimentu tomak konaba fundu ne’e nian.

“Pontu importante husi relatóriu triemestre  ikus ne’ebé kobre periodu 1Outubru to’o 31 Dezembru 2016, kapital fundus nian maka billiaun $15.84. Osan kontadu liquidu ne’ebé sai husi fundu durante trimestre ne’e hamutuk miliaun $ 601.91 kompostu husi milliaun $ 600 transfere ba orsamentu Estadu no milliaun 1.91 kobre kustu jestaun nian, reseitas liquidus durante trimestre ne’e hamutuk milliaun $-565,6 no rendimentu portofóliu periodu ne’e maka -1,14% kompara ho rendimentu referensia maka -1,41%”, nia esplika.

Konferensia imprensa ne’e partisipa mós husi Diretor Ezekutivu  Jestaun Fundu Petroleu ne’e rasik, akompanha ho Diretor balun tan, sosiedade sivil sira hanesan Luta Hamutuk, Lao hamutuk ho Konsellu Konsultivu Fundu Petrolíferu (KKFP).des

Jornal Nacional Diário