Kaderneta TL Kona-ba Demokrásia “Sinál Verde” iha Sudeste Aziátiku

DILI, (ANTIL) – Revista The Economist Intelligence Unit klasifika índise demokrasia Timor-Leste (TL) sai fatin dahuluk ka primeiru lugar iha Sudeste Aziatika. Rezultadu klasifikasaun ne’e fó sai iha 25 Janeiru tinan ne’e bazeia ba rezultadu avaliasaun ba prosesu eleitorál no pluralizmu, funsionamentu governu nian, partisipasaun polítika, kultura polítika no liberdade sivíl sira.

Tuir informasaun ne’ebé ANTIL asesu ohin, Kuarta (8/2) iha Portal do Governo katak índise ne’e koko atu aprezenta “retratu ida kona-ba estadu demokrasia nian iha mundu hotu, ba estadu independente 165 no territóriu rua”.

 “Ferramenta sira kona-ba komparasaun internasionál hanesan índise demokrasia ne’ebé nafatin hasoru dezafiu hodi garante presizaun,” Portavoz governu nian, Ministru Estadu Agio Pereira observa, tuir informasaun ANTIL asesu.

Maske nune’e, tuir portavoz governu ne’e, buat ne’ebé mak ita haree ho momoos hatudu iha ne’e no komparasaun internasionál sira seluk katak ita-nia liberdade sira ne’ebé define ona iha konstituisaun, liuliu prosesu eleitorál no pluralizmu, ne’ebé defende ona ho firme.

Bainhira ita hakbesik ona án ba eleisaun prezidensiál sira iha 20 Marsu no eleisaun parlamentár sira, fulan balu tan, ita uza no afirma fila fali direitu hirak ne’ebá, ho konxiente katak, parte barak iha mundu, sidadaun sira lahetan direitu sira ne’e (no responsabilidade sira)”.

Kaderneta TL Kona-ba Demokrásia, iha índise 2016, iha Sudeste Aziátiku, Timor-Leste sai fatin dahuluk, fatin da-5 iha Ázia no fatin da-43 entre estadu hotu ne’ebé hetan avaliasaun.

Pontuasaun país nian nafatin estavel iha tinan haat liubá, ho 7,24 iha eskala 10, iha ne’ebé kuaze metade husi nasaun sira ne’ebé rejista ona ho rezultadu ne’ebé maka tuun, entre tinan 2006 no tinan 2016.

Timor-Leste hetan rezultadu sira ne’ebé di’ak tuir prosesu eleitorál no pluralizmu, ne’ebé hatudu eleisaun livre no justa sira, direitu sufrájiu (direitu votu nian ba ema hotu), esforsu sira hodi garante liberdade eleitorál sira no prosesu transferénsia administrasaun sira ho orden.

Sufrájiu universál no multipartidarizmu konsagra ona iha konstituisaun Repúblika Demokrátika Timor-Leste (RDTL), artigu 7o hafoin Timor-Leste hetan indepedénsia liuhusi rezultadu eleisaun 30 Agostu 1999.

Katak, 1) Povu hala’o nia kbiit polítiku liu hosi sufrájiu universál livre, diretu, sekretu no periódiku, no liu husi forma seluk tan ne’ebé hakerek ona iha Lei-Inan. Nune’e mós iha alinea 2) Estadu fó valór ba partidu polítiku sira-nia kontribuisaun atu povu hakatak-sai nia hakark rasik tuir organizasaun, no ba sidadaun nia partisipasaun demokrátiku iha hahalok ukun nian iha nasaun laran.

Kaderneta TL Kona-ba Demokrásia bele mós asesu iha link ne’e: http://timor-leste.gov.tl/?p=17298&lang=tp (jornalista: Rafael Belo)