FM: Tenke Disiplina Implementa Lei

Organizasaun Non Governmental Fundasaun Mahein (FM) husu ba komando Jeral Polisia Nasional Timor-Leste (PNTL) tenke disiplina implementa lei organiku artigu 4 ne’ebe koalia kona ba rekolha kilat bainhira oras servisu nian hotu.

Vise Diretor FM, Joao Almeida hateten durante ne’e komando seidauk aplika lei organiku ho disiplina, entaun membrus polisia sira lori tuir kilat ba uma, maske for a da oras servisu nian.

“Tenke iha kontrolu ne’ebe diak, kuandu fora husi oras servisu kilat sira ne’e tenke entrega no rai iha armariu PNTL nian,” nia husu.

Nia dehan, iha ona akontesementu lubuk ida mak kauza husi polisia uza kilat la tuir regras ne’ebe iha.

“Ezemplu; iha tinan 2016 nia laran, polisia konsege tiru mate mane ida ho kondisaun moras mental, inklui tiru kanek membru Falintil-Forsa Defeza Timor –Leste (F-FDTL) iha munisipiu Ainaro,” nia fo ezemplu.

Dadaun ne’e, nia hateten kada eskuadra polisia iha munisipiu no postu administrative koloka ona armariu rai kilat nian, entaun komando tenke kontrolu ba nia membru sira molok fila ba uma, kilat tenke rekolha hotu husi sira.

“Hau fiar sira hotu hetan formasaun kona ba oinsa no bainhira mak bele uza kilat, maibe dala ruma mos hanesan abuzu,” nia dehan.

Iha parte seluk Membru Komisaun B (seguransa, defeza, negosius estrangeirus), Cesar Valente hateten kilat iha polisia kontinua deskontroladu, e lori kilat tuir sira nia gostu no utiliza la tuir dalan.

“PNTL ba festa mos lori kilta, ba mate uma mos lori kilat, ne’e mak hau dehan sei deskontroladu,” nia preokupa.

Tanba ne’e nia sujere, kada membru polisia dadersan mai ba foti kilat rai ho sira nia kartaun iha kilat fatin no bainhira oras servisu hotu ona, tenke ba rai fali kilat no foti fali sira nia kartaun, kuandu kartaun sei iha nafatin, ne’e signifika seidauk entrega kilat, entaun alerta ba provos hodi ka’er membru ne’e.

“Iha pais hotu-hotu regras lo’a hanesan ne’e, no ita presiza halo mos ida ne’e, tanba ida ne’e diak,” nia hateten.

Hatan ba kestaun ne’e, Komandante Operasaun Superintendente Henrique da Costa, hateten kada membru polisia treinadu hotu ona atu oinsa mak uza kilat.

“Sira hatene oinsa uza kilat, iha formasaun sira aprende buat sira ne’e hotu,” nia hateten.

Kona ba membru sira ne’ebe dala ruma utiliza kilat la tuir regras, nia hateten, ne’e depende ba pesoal idak-idak nia karakteristika no komprensaun hodi implementa konesementu ne’ebe sira aprende ona iha sentru formasaun.

The Dili Weekly - Venidora Oliveira