quinta-feira, 9 de fevereiro de 2017

Artista Timoroan la Organizadu, Abio: ALMAMOR Tenke Re-Ativa

PARTILHAR
Prezidente da Repúbliku no Sekretáriu Estadu Juventude husu ba artista timoroan atu organiza-án tanba durante ne’e públiku kestiona maka’as katak katak artista timoroan laiha unidade no la organiza-án didi’ak hodi la’o hamutuk ba oin.

Relasiona ho preokupasaun ne’e. Artista Abio Salsinha hatete artista timoroan hotu atu la’o ba oin hodi dezenvolve muzíka iha Timor maka tenke re-ativa hikas Asosiasaun Nasionál Múzika Timor-Leste (ALMAMOR).

“Ha’u hanoin ema nia krítikas mós positivu hotu. Entaun  linha asosiasaun maka tenke  forte  hodi nune’e mak minimiza buat sira ne’e. Durante loron hirak ne’e ami komisaun nain hira haka’as án hodi nune’e bele reativa fali kongresu ALMAMOR maka sei akontese iha 2017,” Abio Salsinha hato’o kestaun ne’e ba Matadalan iha Bairo dus Grillus, Audian, Díli, foin lalais ne’e.

Abio dehan ALMAMOR durante ne’e la la’o tanba ema idak-idak iha preokupasaun ninian, maybe iha tempu badak sira sei re-ativa hikas asosiasaun ne’e par abele sai parseria ho Governu ba dezenvolvimentu Arte no Múzika iha TL.


Nia esplika prepara hodi hadi’a  kondisaun artista Timor nian mandatu estrutura  ALMAMOR ramata iha tinan 2017 tanba tinan hat (4) ona. Abio dehan iha kongresu nia laran mak sei sai determinasaun  atu desidi  futuru artista  Timor-Leste nian.

“Ita hare dadaun ne’e nu’udar musisi ida sente triste dalaruma  asosiasaun maka la’o hanesan hakat la ba, tamba ne’e mak maluk barak  kanta musika sai iha  rai laran de’it no nunka ba rai liur,” Abio lamenta.

Abio esplika oras ne’e dau-daun sira monta ona komisaun ki’ik ida para hare ba preparasaun kongresu ne’ebé sei akontese iha tinan ida ne’e. “ha’u rasik  ho artista senior lubuk ida  komisaun ida foin dadaun monta hodi  simu  alin Marvi ne’e  ami funsiona fali  prepara hakat ba kongressu  ba dala tolu nian,” Abio dehan.

Abio ne’ebé komesa famozu iha Indonézia ne’e hatete kuandu ALMAMOR estabele ona ho estrutura foun, ho lei foun maka ema sei faloriza artista Timoroan inklui ema bele respeita ona obra artista nian nune’e bele dezenvolve mundu múzika di’ak liutan iha Timor-Leste.

Nia dehan liuhosi múzika maka ema bele espresa nia sentiment ba buat hotu ne’ebé akontese iha rai ida ne’e, ema bele krítika hahalok at sira liuhosi múzika, liuhosi múzika bele fó esp’iritu ba ema seluk atu halo buat rum aba nia rai rasik, tanba ne’e hakarak ka lakohi ALMAMOR tenke hamrik sai mahon ba artista Timoroan hotu.

Ohin loron ema barak uja ema nia múzika arbiru de’it, ema halo Copy Riht múzika tuir ema nia hakarak. Abio dehan kuandu ALMAMOR hamrik ho legalidade ida forte maka sei kontrola fallansu sira ne’ebé ita liu ona hodi hakat ba oin ho di’ak liu tan.

Entretantu deputadu Virgilio Hornay hatete artista Timoroan maka tenke luta maka’as ba sira nia dalan rasik hodi dezenvolve múzika iha Timor-Leste. Nia dehan ho prezensa MarVi hatudu ona dalan ba Artista Timoroan sira atu hamrik hamutuk hodi hamoris hikas ALMAMOR nune’e bele salva guarda talent sira ne’ebé artista sira iha.

Virgilio dehan durante ne’e ita hare artista timoroan sira malirin los atu dezenvolve múzika iha Timor, tanba ne’e momentu ida di’ak atu hahú prepara-án didi’ak atu dezenvolve mundu múzika iha Timor.

Nia husu ba artista sira katak organiza-án uluk karik iha buat ruma ne’ebé presiza Governu ka Parlamentu atu fó apoiu maka orgaun rua ne’e ho laran tomak sei fó apoiu ba artista timoroan sira nia hakarak.

Hatan kona-ba lei ba artista sira. Virgilio dehan iha lejislasaun ida ne’e labele ona produs lei ba artista sira, maybe sei iha lejislatura ida tuir mai karik iha posibilidade maka sei hare hamutuk atu halo lei ida própriu ba artista sira. (Efrem)

Matadalan
PARTILHAR

Author: verified_user

Publicação luso-timorense sem fins lucrativos

0 comentários: