Deskonfia Governu-PN Sai Defensor Emilia Pires

DILI – Publiku kestiona katak, tanba deit kriminoxu Emilia Pires deskonfia halo Parlamentu Nasional (PN) ho Governu sai defensor hotu, hodi julga orgaun judisiariu iha media sosial.

Povu tomak tenke hare Governu ho Parlamentu ida nee, komesa hahu intervensaun ba funsionamentu kada orgaun idak idak. Tanba deit arguida Emilia Pires nia hahalok, neebe fo projetu sosa kama ospital nasional ba nia laen kaben, nunee halo Tribunal hatun sentensa, Emilia hetan pena tinan hitu prizaun.

Se Emilia Pires lasimu desizaun Tribunal Primeiru Distansia, Emilia nia Defensor iha atu halo rekursu ba desizaun nee. Laos Governu ho Parlamentu Nasional maka sai Defensor Emilia Pires nian, hodi kontra desizaun Tribunal nia liu husi halo komenteriu ia media social.

Kasihan povu iha rai ida nee sei sai vitima ba hahalok ukun nais sira hanesan nee iha future no dignidade Estadu sei monu iha mundu Internasional. Tanba hahu ukun aan to agora sempre akontese krizi lideransa neebe maka nunka iha solusaun para resolve.

Tuir Prezidente Parentil Flavio Pereira Lopes katak, Governu ho Parlamentu Nasional labele sai Defensor ba arguida Emilia Pires, para hodi julga fali Juiz sira iha media sosial, kuandu orgaun Ezekutivu ho orgaun Lejislativu maka halo hahalok maka julga fali Tribunal iha media sosial, nee bele estraga sistema judisiariu neebe maka lao iha rai ida nee.

Kuandu sira halo hanesan nee, sira sama tiha ona ita nia sistema justisa ba rai,” dehan Flavio ba STL, iha nia servisu fatin Pantai Kelapa, Dili, Kinta (09/02/2017).

Nia dehan, Governu ho PN tenke sai defensor Emilia, tanba orientasaun husi tuan bos. Kuandu sira lahalo tuir orientasaun husi tuan bos sira, entaun sira bele hasoru difikuldade ba nesesidade moris lor loron.

 Iha parte seluk Alarico Daitula hanesan oan husi Komandante David Alex Daitula hateten,  Kazu Emilia Pires kuaze semana ida nia laran iha polemika foun ida iha neeba mosu, husi  maun boot Xanana Gusmao neebe maka sai hanesan advogadu ba Emilia Pires iha kazu nee.

Entretantu membru PN husi bankada CNRT Arao Noe hateten, Tenke hare kazu pur kazu, tanba durante nee Parlamentu nunka halo tuir ema ida. Carme Ximenes

Suara Timor Lorosae