AFF U-19 Championship 2016, Timor-Leste Sadik Thailandia iha Meais Finais

DILI, (ANTIL) — Timor-Leste hakerek tan istoria furak iha partisipisaun ASEAN Football Federation (AFF) U-19 Championship 2016 hodi hakat ba meias-finais eventu refere hafoin sai runner up Grupu B nian ho pontus 9.

Pontus 9 ne’ebe Timor-Leste hetan, total hosi manan 3 ne’ebe Soldadu Lafaek ne’e hetan hosi manan Filipina 2-1, Malaysia 3-2 no Singapore 2-0. Iha Grupu ne’e rasik Timor-Leste iha jogos 4, maibe iha jogu daruak nian, Timor-Leste lakon hosi uma nain Vietnam 1-4.

Destinu Timor-Leste hodi hakat ba meias-finais desidi iha joga ikus wainhira hasoru Singapura iha 19 Setembru 2016, golu rua ne’ebe hatama hosi Rofinu Gama no Jose Maria hakoi mehi Malaysia ne’ebe ih amos oportunidade bo’ot hodi pasa ba meias-finais. Maibe jogu ikus Malaysia kontra Vietnam, halo uma nain mos la fo oportunidade ba Tigre Malaya. Malaysia lakon iha nia jogu ikus 3-1 hosi Vietnam. Pontos 6 ne’ebe Malaysia hetan halo Timor-Leste mak akompanha Vietnam ne’ebe lidera grupu ne’e ho pontos 10.

Iha jogu meias-finais, 22 Setembru 2016, selesaun nasionál Timor-Leste sei hasoru ekipa Thailándia no Vietnam sei hasoru Australia ne’ebe sai runner up grupu A nian.

“Thailándia ne’e sira nia football avansadu maibé ami tenta oinsá para bele hasoru sira,” hateten assistenti treinador selesaun nasional U-19, Eduardo Pereira ba ANTIL via email, Kuarta (21/09).

Eis jogador FC. Zebra ne’e haktuir katak Timor-Leste lakon ho Vietnam 4-1 iha Tasa ASEAN Football Federation (AFF)  iha 13 Setembru liu-ba tanba jogadór sira balun kolen.

“Iha jogu segundu ho uma na’in Vietnam ita lakon 4-1 ne’e impaktu hosi liña kotuk tanba jogadór hanesan Cândido ho Agostinho to’o iha loron 12 no loron 13 joga kedas maibé hafoin deskansa tiha loron 3, tuir mai joga ho Malázia ita nia jogadór hotu-hotu kondisaun preparadu maka ita manán Malázia 3-2. Nune’e mós ita joga ho Singapore ita manán 2-0 no manán Filipina 2-1,” Eduardo dehan.

Jogu ne’ebé hala’o iha Vietnam Youth Football Training Centre ne’e,  nia dehan, jogadór sira nia performa di’ak tanba jogadór sira unidu (kompak) no disiplina di’ak no mós sira rona treinadór ou halo tuir orientasaun hosi treinadór ho di’ak maka hetan rezulatadu to’o semifinál.

“Iha jogu dala 4 ne’e, ita primeiru hasoru Filipina manán 2-1 ne’e di’ak maibé tuir loloos ne’e manán golu liu maibé tanba ita nia alin jogadór la kompletu tanba jogadór na’in 3 hosi As Ponta Leste foin tuir iha loron 11 Setembru,” Eduardo informa.

Nia esklarese jogadór balun to’o tarde tanba Komisaun Tasa 12 Novembru 2016 la apár ho kalendáriu jogu internationál no la serbisu hamutuk ho Federasaun Futeból Timor-Leste (FFTL) no la haree ba interese nasionál.

“FFTL haruka tiha karta ofisiál ba sira (komisaun) maibé sira la importa. Loloos, Tasa 12 ne’e apár ho kalendáriu jogu internasionál para labele interompe malu. Jogadór selesaun nasionál barak maka joga iha Tasa 12 entaun difikulta sira aranka ba tuir jogu internasionál,” Eduardo tenik.

Nia hatutan jogadór balun mós aleija iha Tasa AFF ne’e maka hanesan Agostinho, Henrique, Feliciano no Pedro. (Jornalista: Xisto Freitas / Editor: Gantry Meilana)

Foto: Jogadór selesaun nasionál TL. Imajen espesiál