Espoza Mauk Moruk Hakoi ona iha Olanda

DILI - Mate isin espoza matebian Mauk Moruk, Joana Gama (Lola), Segunda, (19/09) parte familia ho nia oan na’in tolu deside ona hodi halo serimónia funebre iha semitériu Bonifiatus Kerk Van Vredenburgchweg 67, 2282 SE, Riswijk, Olanda.

Matebian Lola nia isin mate halot iha tuku 10.15 Oras Olanda relasiona ho desizaun oan na’in 3 (tolu), Paulito Gama, Bethune Gama ho Betty Gama.

“Ami iha halot de’it matebian nia isin mate iha Olanda, tanba ne’e Lola nia isin mate la lori ba Timor Leste,”haktuir Familia Matebian Ques Loba Timorone ba Timor Post via mídia sosial Facebook, Tersa, (20/09).

Tuir nia katak, familia hotu sente triste no lakon ema ida, desizaun oan na’in tolu foti tanba haree hosi valores oi-oin, tanba ne’e sira inan hakarak hakoi iha Olanda atu hamutuk nafatin ho sira.

“Se lori ba Timor, sira bele hanoin barak liutan no sente triste ba sira sei la hotu,”hatete nia.

Tuir nia matebian nia isin mate tenke hakoi iha Olanda atu sira nian oan na’in tolu bele halao estudu ho di’ak no la lakon tempu ba mai Timor iha loron bo’ot matebian.

Matebian Mauk Moruk nia kaben Lola hakotu is iha loron Tersa, (13/09), tuku 03:00 tanba sofre moras susar dada iis, no matebian husik hela oan na’in tolu, mane rua feto ida maka oras ne’e eskola hela iha Olanda.

Entretantu antes ne’e, Parte família husu apoiu ba governu liuhosi Ministériu Negósiu Estranjeirus no Kooperasaun (MNEK) atu hodi fila mai Timor Leste nune’e bele halo serimónia funerál.

“Ha’u mai iha ne’e atu husu apoiu ba governu para ajuda lori fila ha’u nia alin Mauk Moruk nia ferik oan mate iha Olanda atu hodi fila mai hakoi iha Timor Leste,” haktuir Cornelio Gama (L-7) ba jornalista iha Ministériu Negósiu Estranjeiru no Kooperasaun (MNEK), Praia dos Coqueirus Kuarta, (14/09).

L7 hatete, matebian Mauk Moruk nia kaben Lola hakotu is tanba sofre moras susar dada iis, no matebian husik hela oan na’in tolu, mane rua feto ida maka oras ne’e eskola hela iha Olanda.

Tanba ne’e família  sira iha hanoin ona atu lori fila matebian Mauk Moruk nia ferik oan nia isin mate no nia oan na’in tolu ne’ebé maka eskola hela iha Olanda atu fila mai Timor Leste hodi hamutuk ho família  sira.

L7 husu governu atu halo despaisu ida atu hatun hodi ba foti Mauk Moruk nia ferik oan iha Olanda atu fila mai halo seremonia funerál iha Timor Leste.

“Ami família  husu governu atu hatun despaisu ida ba família  atu trata Mauk Moruk nia ferik oan nia isin mate mai Timor Leste,”hatete L-7.

Maske família matebian hakat ona ba iha odamatan MNEK nian, maibé Ministru Negosiu Estranjeirus no Kooperasaun (MNEK) Hernani Coelho laiha fatin.

Tuir L-7 katak, Gabinete Ministru MNEK nian foin maka halo kontaktu ba Ministru, tanba ne’e maka seidauk simu informasaun ida klaru kona-ba karta despaisu ne’ebé maka família  sira husu.

Nia dehan, Mauk Moruk nia ferik oan ema Timor Leste, tanba ne’e sei la hakoi iha ema nia rai, tanba rai iha ne’eba la iha atu hakoi Mauk Moruk nia ferik oan nia mate isin.

Entretantu governu liu hosi Ministru Negósiu Estranjeiru (MNEK) Hernani Coelho seidauk responde ba pedidu ne’ebé maka família matebian husu, tanba ministru sai ba rai liur no nia vise  Roberto Soares sei moras hela.(gus)

Timor Post