Presiza Konsiénsia Bainhira Lori Motor-Kareta

DILI, (ANTIL) – Membru Parlamentu Nasionál, Komisaun A ne’ebé trata asuntu konstitusionais, justisa, administrasaun públika, poder lokál no legislasaun governu, Adriano do Nascimento hateten, sidadaun idaidak bainhira hakarak atu lori motor no kareta presiza iha konsiénsia.

“Atu hamosu konsiénsia individual claro que tenke la’o liu husi família. Inan-aman fó hanoin ba oan sira, mestre sira nomós instituisaun seluk hanesan igreja no sira seluk ne’ebé iha kompeténsia atu halo konsensiálizasaun”, Adriano ba jornalista sira iha uma fukun PN, Tersa, (20/9).

Seluk, tuir Adriano katak estadu halo lei hodi regula ema ne’ebé hemu tua katak lanu labele lori transporte no polísia halo check point hodi hapara no karik iha ekipamentu balun bele hodi detekta ema ne’ebé lori motor no kareta ne’e nia kondisaun, lanu ka la’e.

Deputadu ne’e esplika katak ida ne’e importante tebes atu evita dezastre ne’ebé akontese lorloron akompaña direta nomós liuhusi mídia inklui rede sosiál sira.

Tanba ne’e nia subliña, família bainhira sosa motor no kareta, fó ba oan sira, la kontrola mak bainhira oan ba ransu malu, hemu tua, sei hamosu desvantajen ba vida rasik nomós ema seluk nia vida.

Haree ba situasaun asidente ne’ebé akontese kuaze lorloron, nia informa katak Timor-Leste seidauk iha lei ne’ebé rigoroza kona-ba fa’an no konsumu tua, nune’e iha fatin ka kioske ne’ebé de’it ita hetan ema fa’an tua.

Kazu ema monu ka soke ho transporte até mate tanba tua, ida ne’e presiza regula fatin no iha fatin ne’ebé mak adekuadu hodi konsumu tua.

Tuir dadus Polísia Nasionál Timor-Leste (PNTL) fó sai husi komandante operasaun, superintendente xefe polísia, Henrique da Costa iha Kuartel Jerál, Kaikoli, Tersa (20/9) katak iha semana ne’e totál asidente tráfiku hamutuk 43, husi totál ne’e na’in lima mak mate, na’in lima kanek todan no seluk kanek kamaan.

Komandante Henrique da Costa esplika katak asidente tráfiku akontese tanba fatór umanu, tanba ne’e atu minimiza kazu ne’e, tuir komandante ne’e katak polísia halo nafatin sosializasaun kona-ba kodígu estrada atu eduka komunidade sira liu husi eskola no iha bairu sira liliu iha kapitál Díli no iha bairu sira. (jornalista: Rafy Belo; editora: Rita Almeida)