Timoroan sira iha estranjeiru sei bele vota ba dala uluk iha tinan 2017 - ministru

Timoroan sira ne'ebé hela iha Austrália ho iha Portugal sei bele iha tinan 2017, no ba dala uluk dezde Timor-Leste hetan independénsia, vota iha eleisaun prezidensial no lejislativu sira, hatete hosi ministru Administrasaun Estatal ba Lusa.

"Sira nunka bele vota dezde Timor-Leste sai hanesan nasaun ida. Nune'e bele rejista ona katak Governu ida ne'e hakarak atu sai hanesan akontesimentu ida ba dala uluk", Dionísio Babo hatete iha entrevista ba Lusa.

Tuir esplikasaun hosi Babo, ne'ebé hanesan mós ministru Estadu, Kordenadór ba Asuntu sira Administrasaun Estadu nian, prosesu resenseamentu sei loke entre Outubru no Dezembru, agora iha de'it Austrália no iha Portugal, ne'ebé iha prezensa maka'as hosi komunidade timoroan nian.

Nia esplika katak iha kazu Portugal nian sei habelar mós ba luzu-timoroan millaun resin ne'ebé serbisu daudaun iha Inglatera ho Irlanda no ne'ebé tenki halo resenseamentu iha Lisboa.

"Prosesu resenseamentu sei hahú iha Outubru. Ba votasaun, ami sei hanoin hela métodu di'ak liu", nia hatete no esplika katak bele husu fatin iha Lisboa ba Governu portugés ba asaun eleitoral.

Asaun úniku ne'ebé maka timoroan sira iha estranjeiru halo ba votasaun maka iha referendu loron 30 Agostu 1999, ka antes restaurasaun independénsia, hahú tempu ne'e maka sira labele partisipa iha asaun eleitoral ida.

Desizaun hodi avansa ho resenseamentu eleitoral ba votu sira tinan 2017 foti iha reuniaun ikus hosi Konsellu Ministru sira nian.

Babo esplika ona katak iha Austrália sei hanoin katak bele ezisti fatin rejistu oioin no, hafoin ne'e, hosi votasaun, karik iha timoroan rihun 70 resin maka hela iha nasaun ne'e, inklui "eleitoral rihun 20 resin".

Iha Portugal - konta ho populasaun 8.000 iha Irlanda ka Inglatera - bele iha total ida hamutuk rihun 20 resin.

SAPO TL ho Lusa