Governu La Hapara Kazu Espionajen Kontra Australia

DILI - Primeiru Ministru (PM) Rui Maria de Araújo hatete, governu la hapara kazu espionajen ne’ebé mak Austrália halo ba Timor Leste, kazu refere iha prosesu ida, la hamutuk ho kazu Fronteira Martima (FM) ne’ebé mak governu Timor Leste prosesa ba Organizasaun Nasoes Unidas (ONU).

“Ita la hapara kazu espionajen ne’ebé mak antes ne’e Austrália halo ba ita, prosesu ne’e governu Timor Leste kontinua levanta,” haktuir PM Rui ba jornalista iha Palásiu Governu, Sesta, (16/09).

Tuir esplika, prosesu espionajen, ne’e la’ós  governu Timor Leste atu hapara, Timor Leste kontinua avansa.

“Agora ita hein de’it tribunal atu marka prosesu julgamentu bainhira, ita la hapara,” hatete PM Rui.

PM Rui iha nia intrevista hatete, prosesu ba kazu espionajen ne’ebé mak Austrália halo ba Timor Leste, ne’e kazu ketak ida, ne’ebé mak atu halo julgamentu iha tribunal ketak ida, la’ós  tribunal hanesan ho kazu fronteira marítima.

Prosesu julgamentu ba kazu espionajen sei kontinua halo iha tribunal Olanda.

Entretantu Primeiru MInistru (PM) Rui Maria de Araújo hatete, prosesu ba kazu Fronteira Marítima ne’ebé mak governu Timor Leste avandsa ho konsiliasaun kompulsoria obrigatoriu, ne’e iha prosesu ida.

“Hanesan ita hotu hatene, prosesu konsiliasaun kompulsoria Obrigatoia ne’ebé mak Timor Leste levanta ba ONU, ne’e lao ho faze”hatete PM Rui.

Foin lalais iha Austrália la konkorda, ne’e tanba komisaun konsiliasaun la iha autoridade atu deskute prosesu ne’e.

Timor Leste hato’o nia argumentasaun, Austrália mos hato’o sira nia argumentasaun hodi komisaun ne’ebé forma hosi ONU mak atu deside oinsa.

“Ne’ebé prosesu ba fronteira maritime foin mak to’o iha faze ida ne’e, ne’ebé rezultadu ne’e ita hein de’it depois mak komisaun ne’e sei hato’o nia desizaun ba prosesu refere”hatete PM Rui.

Entretantu Xefi Secretariu Nasionál Asosiasaun Combatente Libertasaun Nasionál (ACVLN) MArtinho R. Pereira haktuir, veteranus Timor Leste firme hodi fo apoiu governu dudu prosesu Fronteira Marítima to’o hetan nia soberania.

Nudar veteranus sempre fo apoiu ba governu hodi liberta soberani Timor Leste nian totalmente.

“Uluk ita funu hasoru Indonezia, tanba de’it hakarak liberta soberani Timor Leste nian, entaun depois hetan tihaa soberania tenke iha liña fronteira hanesan tasi, rai maran no lalehan” Xefi Secretariu Nasionál Asosiasaun Combatente Libertasaun Nasionál (ACVLN) Martinho R. Pereira ba Timor Post iha nia kna’ar fatin, Bairo dos Grilhos, Bidau, Sabadu, (17/09).

Tuir nia katak, governu avansa ho konsiliasaun kompulsoria obrigatoriu ba Organizasaun Nasoes Unidas (ONU) hodi deskute tuir lei internasionál ba tasi nian tuir dalan UNCLOS.

Tanba ne’e governu agora tenke prepradu hodi simu konsikuensia hotu, uainhira iha lei internasionál Austrália lakon ho Timor Leste.

Tenke buka halo diplomasia atu labele hamosu komflitu, maske maun bo’ot sira hatete dehan, atu mate tan tanba de’it soberania Timor Leste nian.

Tuir nia katak, nasaun Timor Leste hansan País no Organizasaun Nasoes Unidas (ONU) rekoiñese, tanba ne’e labele hakfodak ho ameasas Austrália nian.

Agora Austrália la fo ulun atu tu’ur deskute konaba fronteira tasi, lahatene sira iha baze saida, mas Timor Leste mos iha baze atu defende nia soberania.

“Hanesan nasaun independente tenke iha nia fronteira, ne’ebé ita tenke iha fronteira tasi, fronteira rai maran no fronteira lalehan”hatete Martinho.

Austrália la kohi fo ulun hodi deskute tanba iha interese ba mina, ne’ebé Timor Leste mos labele atu fo oportunidade ba Austrália atu uza de’it.(gus)

Timor Post